Վենետիկի հանձնաժողովի 119-րդ նստաշրջանի հայտնի արձանագրության և Սահմանադրական դատարանի շուրջ ստեղծված իրավիճակի մասին «Առաջին լրատվական»- ի հետ քննարկմանը մասնակցեցին քաղաքագետ Արմեն Բաղդասարյանը, վերլուծաբաններ Աղասի Մարգարյանը և Հակոբ Բադալյանը:
Արմեն Բադալյանի խոսքով՝ Վենետիկի հանձնաժողովի նստաշրջանի արձանագրության հետևանքով առաջացած իրարանցումը արհեստական է, որովհետև որոշ քաղաքական շրջանակներ աշխատանքային այդ փաստաթղթի բովանդակությունը տարածեցին լրատվամիջոցներով. «Դա ներկայացրին որպես հաղթաթուղթ կամ դեղին քարտ ՀՀ նոր իշխանություններին և քարոզչական նպատակներով դա օգտագործեցին: Նախկին իշխանությունները հույս ունեն դրա արդյունքում պահել իրենց վերջին բաստիոնը՝ դատական համակարգը և ՍԴ-ն»:
«Խոսքն արձանագրությունից որոշակի հատվածների արտահոսքի մասին է. խնդիրն այն է, թե ինչպես են սահմանափակ հասանելիությամբ փաստաթղթի բովանդակությունից ինչ-որ հատվածներ ինչ-որ շրջանակների կողմից տարածվում, մեկնաբանվում և շահարկվում»,- նշեց Աղասի Մարգարյանը՝ հավելելով, որ Վենետիկի հանձնաժողովի հայկական կողմի ներկայացուցիչներն են Գագիկ Հարությունյանը և Վարդան Պողոսյանը, ովքեր մասնակից են դարձել արտահոսքին: Վերլուծաբանի խոսքով՝ Վենետիկի հանձնաժողովի արձանագրությունը դիրքորոշում չի արտահայտում և ընդհանրապես Վենետիկի հանձնաժողովը չի կարող ինչ-որ բան պարտադրել, քանի որ խորհրդատվական կառույց է: Վենետիկի հանձանաժողովը արդարացիորեն մտահոգություն է արտահայտում՝ կապված վեթինգ տերմինի ընկալման հետ՝ հաշվի առնելով եվրոպական որոշ երկրներում վեթինգի ոչ արդյունավետ կիրառումը: Էականը գործընթացի անունը չէ, այլ այն, թե ինչ գործիքակազմ է կիրառվում, ինչ մարմին է դա իրականացնում և ինչ սկզբունքների հիման վրա»:
Հակոբ Բադալյանի դիտարկմամբ՝ խնդիրն առավելապես քարոզչական էր. «Նախկին իշխանության համակարգը փորձեց քարոզչական առավելագույն էֆեկտ ստանալ այսպիսի թույլ առիթից… Իսկ դա նախկին իշխանության շրջանակների մոտ ստացվում է, որովհետև այնտեղ դրանով զբաղվում են պրոֆեսիոնալ մարդիկ, որոնք տարիների փորձ են կուտակել: Պետք է արձանագրել, որ տեղեկատվական այս գործընթացներում իշխանությունը ակնհայտորեն զիջում է, և զիջելը փոխհատուցվում է միայն իշխանության լեգիտիմությամբ: Ակնհայտ է, որ նախկին համակարգը իշխանության նկատմամբ տեղեկատվական ագրեսիվ արշավ է մղում, և իշխանությունն այս տեղեկատվական պատերազմում տանուլ է տալիս»:
Մանրամասն՝ տեսանյութում: