Հայաստանի Ազգային ժողովի նախագահ Արարատ Միրզոյանը Վաշինգտոնում հյուրընկալվել է «Ատլանտյան խորհուրդ» (Atantic Council) հետազոտական կենտրոնում, և ի թիվս տարբեր հարցերի՝ Միրզոյանը անդրադարձել է նաև Իրանի նկատմամբ ԱՄՆ պատժամիջոցների թեմային: «Մենք կցանկանանք, որ ԱՄՆ-ը ճնշում չգործադրի Հայաստանի վրա՝ իրանական պատժամիջոցների օրակարգում ներգրավվելու համար: Հայաստանը չի կարող նման գին վճարել»,- ասել է նա: Արարատ Միրզոյանն ընդգծել է, որ տարածաշրջանում առկա լարվածությունը ԱՄՆ-Իրան հարաբերություններում բացասաբար է անդրադառնում Հայաստանի տնտեսության վրա: Նա կարևորել է Թեհրանի հետ հարաբերությունները, քանի որ Հայաստանի չորս սահմաններից երկուսը փակ է: Նրա խոսքով՝ հարաբերությունների զարգացումը բարեկամ մեկ երկրի հետ չպետք է լինի ի հաշիվ բարեկամ մեկ այլ երկրի:
ՄԱՀՀԻ փորձագետ, իրանագետ Արմեն Վարդանյանի կարծիքով՝ Արարատ Միրզոյանի հայտարարությունը բխում է Հայաստանի շահերից, քանի որ մենք հակաիրանական որևէ կոալիցիայի միանալ չենք կարող: «Կարծում եմ՝ ԱՄՆ-ում ևս այս ըմբռնումը կա՝ չնայած Ջոն Բոլթոնի Երևան այցի ժամանակ ինչ-որ հարցեր արծարծվել են։ Արարատ Միրզոյանի այս հայտարարությունը ես միանշանակ դրական եմ գնահատում, ՀՀ իշխանությունները բացահայտ կամ ոչ բացահայտ կերպով ասել են՝ մենք հակաիրանական որևէ կոալիցիայի միանալ չենք կարող»,- «Առաջին լրատվական»-ի հետ զրույցում ասաց նա։
Արմեն Վարդանյանը չբացառեց, որ Հայաստանի նկատմամբ նման ճնշումներ կարող են լինել, բայց միևնույն ժամանակ նշեց. «Իմ խորին համոզմամբ՝ Արևմուտքում էլ են շատ լավ հասկանում Հայաստանի վիճակը, և Արարատ Միրզոյանն էլ այդ մասին նշեց՝ Հայաստանը, շրջափակված լինելով երկու կողմից՝ Թուրքիայի և Ադրբեջանի կողմից, չի կարող երրորդ հարևանի հետ էլ հարաբերությունները փչացնել։ Նախկինում էլ են իշխանությունները այս դիրքորոշումը հայտնել, ընդ որում՝ Հայաստանի արտաքին քաղաքականության մեջ այս հարցի շուրջ փոփոխություն չի եղել։ Նախկին իշխանություններն էլ հասկացրել են, որ հակաիրանական որևէ սանկցիայի չեն կարող միանալ և չեն կարող փչացնել հարաբերություններն իրենց հարևանի հետ»։
Մեր զրուցակցի կարծիքով՝ Հայաստանի համար ձեռնտու կլինի չեզոքություն պահպանել Իրան-ԱՄՆ առճակատման հարցում. «Հայաստանը այն պետությունը չէ, որ կարողանա ազդել այդ երկու պետությունների հարաբերությունների վրա։ Հայաստանը տարածաշրջանում և աշխարհում խաղի կանոններ փոխող չէ՝ ի տարբերություն Իսրայելի։ Բնականաբար մեզ մնում է միայն չեզոքություն պահպանել։ Նույն շատ ուժային կենտրոններ՝ ԵՄ-ն, Չինաստանը, Ռուսաստանը, չեն կարողանում ազդել ԱՄՆ-Իրան գրեթե պատերազմի հասնող հարաբերությունների վրա։ Հայաստանն առավել ևս չի կարող որևէ կերպ իրավիճակի վրա ազդեցություն ունենալ, ուստի մնում է միայն չեզոքություն պահպանել։ Մեզ մնում է հուսալ, որ այդ հարաբերությունները կբարելավվեն ու կկարգավորվեն, այլ ազդեցություն ունենալ չենք կարող»։
Արարատ Միրզոյանը մեկ այլ ուշագրավ հայտարարություն է արել և նշել, որ Հայաստանը հետաքրքրված է զարգացնելու հարաբերությունները Միացյալ Նահանգների հետ և այդ առումով չի տեսնում խոչընդոտներ։ «Մեր հարաբերությունները պետք է դիվանագիտական հռչակագրերի դաշտից տեղափոխվեն հստակ գործընկերային հարաբերությունների դաշտ: Անհրաժեշտ է կառուցել օրակարգ՝ ուղղված դեպի կոնկրետ նպատակների իրականացում»,- նշել է նա։
Երախտագիտություն հայտնելով տարիների ընթացքում տրամադրված ամերիկյան օգնության համար՝ նա ընդգծել է, որ Միացյալ Նահանգների աջակցությունը կարևոր է Հայաստանի համար ոչ միայն տնտեսական, ներդրումային, փորձի փոխանակման ոլորտներում, այլև քաղաքական դաշտում: Ամերիկյան աջակցության հարցում, սակայն, ըստ խոսնակի, դեռևս առկա են շատ անելիքներ:
Արմեն Վարդանյանի դիտարկմամբ՝ Հայաստանը ԱՄՆ-ից որևէ բան չի կարող պահանջել, բայց փոխարենը կարող է խնդրել. «Ամեն դեպքում Հայաստանում լուրջ փոփոխություններ են տեղի ունեցել։ Թեև ոչ բացահայտ՝ այդուհանդերձ, Հայաստանի իշխանությունները գնում են Ռուսաստանի ազդեցության տակից դուրս գալու ճանապարհով։ Այդ ճանապարհին, այո՛, Հայաստանը նաև ԱՄՆ-ի օգնության կարիքն ունի։ Միգուցե այդ մասին պետք չէ բացահայտ ասել, բայց գուցե փակ հանդիպումներում կարելի է խնդրել ԱՄՆ-ից, որ օգնեն Հայաստանին դուրս գալ այս իրավիճակից։ Ընդ որում՝ այս հարցում Հայաստանի և ԱՄՆ-ի շահերը միանգամայն համապատասխանում են իրար, որովհետև ԱՄՆ-ին էլ է ձեռնտու Ռուսաստանից քիչ կախվածություն ունեցող, Ռուսաստանի կախվածությունից թոթափված Հայաստանը։ Կարծում եմ՝ այնտեղ էլ կա այդ ըմբռնումը։ Վերջին տարիներին անընդհատ պակասեցվում էին Հայաստանին տրվող ֆինանսական օժանդակության ծավալները, բայց հիմա ինչպես գիտեք՝ արդեն 40 միլիոն դոլար Հայաստանին տրամադրելու նախաձեռնություն կա»։
Թեպետ սա Կոնգրեսի նախաձեռնությունն է, Վարդանյանը վստահ է՝ եթե Թրամփը դրան դեմ լիներ, այդ նախաձեռնությունը հաջողություն չէր ունենա, և կլինեին այն արգելափակող գործընթացներ։
Դիտարկմանը, թե ֆինանսական օգնություն ստանալու համար ինչ է Հայաստանն առաջարկում ԱՄՆ-ին, Վարդանյանն արձագանքեց. «Տարբեր երկրներ տարբեր բաներ են առաջարկում, օրինակ՝ որոշ երկրներ իրենց հակաիրանական պահվածքն են վաճառում ԱՄՆ-ին ու դրա դիմաց ֆինանսական օժանդակություն ստանում, որոշ երկրներ՝ հակառուսական կեցվածքը, բայց մենք հասկանալի պատճառներով այս հարցերում որևէ բան չենք կարող առաջարկել ԱՄՆ-ին։ Բայց Հայաստանը ժողովրդավարական բարեփոխումներ է ուզում իրականացնել, ու դա պետք է որ աջակցություն ստանա ամերիկյան վարչակազմի կողմից։ Պետք է խրախուսենք նաև ամերիկյան ներդրումները, բայց այս հարցում Հայաստանի իշխանությունները շատ վատ են գործում»։
Վարդանյանը նկատի ունի Ամուլսարի հանքը. «Մենք գիտենք, որ «Լիդիանը» ամերիկյան ընկերություն է, մեր պետությունը այն շահագործելու իրավունք չի տալիս, չնայած վերջին տարիների համար աննախադեպ՝ մոտ 400 միլիոն դոլարի ներդրումներ կատարելու մասին է խոսքը։ Պատահական չէ, որ հեռացող դեսպան Միլսը մի քանի անգամ իր դժգոհությունը հայտնեց, հարցը պետք է կարգավորել, որ ամերիկյան ներդրումների ծավալը Հայաստանում ավելանա»։
