«Ծագումով Երևանից եմ, ապրում եմ Ֆլորենցիայում, այստեղից տանում եմ հայկական հարստությունը՝ քանդակագործ Արա Հարությունյանից ստացած ոգեշնչվածությունս, և այնտեղից բերում եմ ֆլորենտական հարստությունը՝ ոգեշնչվածություն, որը ստացել եմ Միքելանջելոյից»,- «Առաջին լրատվական»-ի հետ զրույցում այս մասին ասաց քանդակագործ Վիգեն Ավետիսը, ով երկքաղաքացիություն ունի, բնակվում է և՛ Իտալիայում, և՛ Հայաստանում:
«Երբ նվիրվում ես աշխատանքիդ, բացվում են այնպիսի ճանապարհներ, որ մտքովդ անգամ չէր անցնի»,- նշեց քանդակագործը հավելելով, որ վերջերս մի շատ կարևոր նվիրատվություն է կատարել Հռոմի Պապին՝ ի նշան երախտագիտության հայության նկատմամբ նրա ուշադրության և Ցեղասպանության զոհերի հիշատակին մատուցած պատարագի. «Հռոմի Պապին նվիրած քանդակը կոչվում է «Հայոց մայր», այն ցուցադրվել է աշխարհի տարբեր քաղաքաներում և շուտով իր հանգրվանը կգտնի Ֆլորենցիայում՝ Հռոմի Պապի օրհնությամբ… Հայաստանում ծրագրեր ունեմ իրականացնելու՝ նաև համագործակցելով և՛ Վատիկանի, և՛ Հայ առաքելական եկեղեցու հետ»:
Ցանկանալով օգտակար լինել երիտասարդներին՝ Վիգեն Ավետիսը սկսել է դասավանդել Գեղարվեստի ակադեմիայում, նաև այս տարվա հունվարից աշխատանք է սկսել «Մխիթար Սեբաստացի» կրթահամալիրում՝ հիմնելով «Վիգեն Ավետիս» քանդակի դպրոցը: Քանդակագործի խոսքով՝ «Մխիթար Սեբաստացի» կրթահամալիրում հաջողությամբ ընթանում է քանդակագործության, ճարտարապետության, շրջակա միջավայրի միջազգային ամենամյա փառատոնը. «Բանգլադեշը հարյուր սովորողի աչքերով» նախագծի ղեկավարը ճարտարապետ Ռոբերտո Ռավալին է: Փառատոնային նախագծերին են միացել քանդակագործ գործընկեր-կազմակերպիչներ աշխարհի տարբեր մասերից:
«Պետք չէ սպասել, որ վերևներից մեզ հրամաններ գան, ինքներս պետք է գեղեցկացնենք մեր շրջակայքը»,- ընդգծեց քանդակագործը: Նրա խոսքով՝ աշխարհը Հայաստանին ճանաչում է թավշյա հեղափոխությունով, թեև այն դեռ չի ավարտվել: «Հայաստանն ազատ կլինի, երբ Պուտինի ռեժիմը ընկնի»,-ընդգծեց քանդակագործը:
Մանրամասն՝ տեսանյութում: