Հայաստանի քաղաքական-իրավական կյանքը կրկին փոթորկվել է: Փորձ էր արվում դատական համակարագի հեղափոխություն իրականացնել, ՍԴ-ի շուրջ էին զարգացումներ ծավալվում, և հիմա էլ Վենետիկի հանձնաժողովի 119-րդ նստաշրջանի արձանագրությունն է բուռն քննարկումների տեղիք տվել Հայաստանում, և այն հիմնականում տիրաժավորվում է նախկին իշխանության ներկայացուցիչների կողմից:
«Վենետիկի հանձնաժողովն արձանագրել է, որ Եվրոպայից ժամանած պատվիրակության հետ քննարկումների արդյունքում Հայաստանի իշխանություններն ընդունել են, որ բոլոր պաշտոնավարող դատավորների ընդհանուր վեթինգը ո՛չ անհրաժեշտ, ո՛չ էլ օգտակար կլինի». թեմայի շուրջ «Առաջին լրատվական»-ի հետ զրույցում անդրադառնալով այսպիսի բովանդակությամբ հայտարարություններին՝ ԱԺ «Իմ քայլը» խմբակցության պատգամավոր Սիսակ Գաբրիելյանը նշեց. «Վենետիկի հանձանաժողովի հետ հանդիպել ենք մենք՝ մի խումբ պատգամավորներ և կառավարության անդամներ, այդ թվում՝ արդարադատության նորանշանակ նախարարը, մենք նշել ենք, որ եթե վեթինգ եզրույթի հետ է կապված խնդիրը, ապա մեզ համար դա նշանակություն չունի, պայմանական կարող ենք անվանել վեթինգ, կարող ենք անվանել բարեվարքություն և այլն, դա էական չէ, մեզ պետք են դատաիրավական բարեփոխումներ՝ որոշակի չափանիշներով: Եվրոպական երկրներում վեթինգ եզրույթը այլ կերպ է ընկալվում՝ հաշվի առնելով Ալբանիայի օրինակը: Կարծում են, որ վեթինգը օգտակար չի լինի և առաջարկում են այն, ինչ մենք ենք ի սկզբանե ուզել՝ կարգապահական ընթացակարգերի չափանիշները հստակեցնել և կապ ստեղծել եկամուտների հայտարարագրման համակարգի հետ»: Պատգամավորը նաև ընդգծեց, որ վեթինգ միևնույն է լինելու է, անկախ նրանից՝ այս եզրույթը կօգտագործվի, թե ոչ:
«Իրազեկ քաղաքացիների միավորում» ՀԿ ծրագրերի ղեկավար Դանիել Իոաննիսյանի դիտարկմամբ՝ նախկին իշխանության ներկայացուցիչները մանիպուլացնում են Վենետիկի հանձնաժողովի մոտեցումները. հեղափոխությունն այդ մարդկանց չի փոխվել: «Վենետիկի հանձնաժողովը զուտ խորհրդատվական մարմին է…Իրականում չպետք է ուռճացնել նրա դիրքորոշումը: Վենետիկի հանձնաժաղովի հայտարարությունը բռնում է իշխանության քաղաքական գծի հետ, միայն տերմինոլոգիան է տարբերվում»:
Վերլուծաբան Գոռ Հակոբյանի դիտարկմամբ՝ թեև Վենետիկի հանձնաժողովը խորհրդատվական մարմին է, բայց իրավունքի մեկնաբանման տեսանկյունից հեղինակավոր կառույց է, և նախկինում իշխանությունը և ընդդիմությունը նրանց կարծիքը օգտագործել են լեգիտիմություն ստանալու համար: «Այս պահին, եթե Վենետիկի հանձնաժողովի հարցը քննարկվում է, մենք ուզում ենք հետ գնալ հին դրվածքին, որ լեգիտիմությունը բխում է միջազգային հանրությունից, ո՛չ, լեգիտիմությունը բխում է ժողովրդից»,- նշեց Գ. Հակոբյանը:
Մանրամասն՝ տեսանյութում: