Սահմանափակ տարածմամբ հրապարակվել է Վենետիկի հանձնաժողովի 119-րդ նստաշրջանի արձանագրությունը, որը հույժ կարևոր նկատառումներ է պարունակում Հայաստանում ընթացող գործընթացների վերաբերյալ: Թեման քննարկելու համար «Առաջին լրատվական»-ը հյուրընկալել է «Իրավունքի Եվրոպա» ՀԿ նախագահներ, փաստաբաններ Տիգրան Եգորյանին և Լուսինե Հակոբյանին:
Եվրոպայից ժամանած պատվիրակության հետ քննարկումների արդյունքում ՀՀ իշխանությունները ընդունել են, որ գործող դատավորների համընդհանուր վեթինգը ո՛չ անհրաժեշտ է և ոչ էլ օգտակար: Այս առնչությամբ Տիգրան Եգորյանն ասաց. «Սա մի քննարկում է, որի շրջանակներում ՀՀ իշխանության ներկայացուցիչները ներկայացրել են այս կամ այն գործընթացը, արդարադատության ռեֆորմն իրականացնելու իրենց պատկերացումները»:
Նրա խոսքով՝ ՀՀ իշխանությունները որոշել են այդ՝ գրեթե անհնարին ծրագիրը այս փուլում փոխարինել այլ, այսպես ասած, վեկտորով, որը հարվածային եղանակով կլուծի այն ամենախնդրահարույց պրոբլեմը, որն արգելակում է ամբողջ դատական համակարգի արդյունավետ գործունեությունը. «Մասնավորապես, դա արտացոլված է առանց բոլոր դատավորների տոտալ և անմիջապես այս պահին մեկնարկող վեթինգի: Եվ, ըստ իշխանության ներկայացուցիչների, այս հարցի լուծումը պետք է և հնարավոր է իրականացնել այս պահին գործող Բարձրագույն դատական խորհրդի միջոցով»:
Լուսինե Հակոբյանի կարծիքով՝ Վենետիկի հանձնաժողովի արձանագրությունը իր մեջ որևէ կարծիք չի արտացոլում. «Ընդամենը քննարկումների արձանագրություն է՝ հնչեցված Վենետիկի հանձնաժողովի տարբեր անդամների տարբեր մտքերի»:
Տիգրան Եգորյանն էլ հավելեց, որ այս պահին ՀՀ իշխանությունների կողմից դիմում չկա կարծիք ստանալու խնդրանքով: Նրա խոսքով՝ Վենետիկի հանձնաժողովի կողմից էլ կարծիք չկա. «Ամբողջ խնդիրն այն է, որ այս ապատեղեկատվությունը և տեղեկատվական հոսքի խցանումը հենց այն մասին է, որ այս թուղթը ներկայացվել է որպես կարծիք: Այս թուղթը որևէ կարծիք չի ներկայացնում, սա ուղղակի Վենետիկի հանձնաժողովի նիստի արձանագրություն է»:
Փաստաբանը նկատեց՝ կարկառուն, հանրաճանաչ ՀՀԿ-ականները ու դրան մերձ շրջանակները և դրանով իրենց կյանքի ուղին հարթածները՝ տարբեր ոլորտների էքսպերտներն ու իմաստության ակունքները, այս տիպի իրավիճակներում իրենց համար ցանկալի խնդիրներն ու լուծումները կուսակցական խողովակներով ու մանիպուլյատիվ աշխատանքի արդյունքում, իշխանության ուժն օգտագործելով, բերում էին ու պարտադրում էին հանրությանը՝ իբրև դրսի համակարծությունն ու համախոհությունը վայելող տարբերակներ. «Այսօր այդ ուժը չունի իշխանություն, և դրա միակ ապավենը այսպես՝ համացանցերում տեղեկատվական խցանում առաջացնելն է»:
Հարցազրույցն ամբողջությամբ՝ տեսանյութում:
