Քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժնում ՀՀ քր. օր-ի 112 հոդվածի 2-րդ մասի 14-րդ կետով հարուցվել է քրեական գործ։ Նշված քրգործը հարուցվել է այսօր՝ հուլիսի 15-ին, «Արմենիա» բժշկական կենտրոնից ոստիկանության Մաշտոցի բաժին ստացված ահազանգի փաստով։ Այս մասին հայտնում է Shamshyan.com-ը:
Հիվանդանոցից հայտնել են, որ «կրծքավանդակի մասում՝ դանակահարված» ախտորոշմամբ իրենց մոտ է տեղափոխվել մի տղամարդ։ Հիվանդանոց մեկնած օպերատիվ խումբը պարզել է, որ վիրավորը Երևան քաղաքի Մարգարյան փողոցի բնակիչ, 33-ամյա Արման Մեհրաբյանն է։ Նա ի վիճակի չէ կատարվածի մասին բացատրություն տալ: Այսօր՝ ժամը 05։00-ի սահմաններում, Ա. Մեհրաբյանը, հիվանդանոցի վերակենդանացման բաժանմունքում գիտակցության չգալով, մահացել է։ Ձեռնարկվում են անհրաժեշտ օպերատիվ-հետախուզական և քննչական գործողություններ՝ դեպքի հանգամանքները պարզելու ուղղությամբ։
