Նոյեմբերի 20-ին Լիսաբոնում կայացած ՆԱՏՕ-ի գագաթաժողովին Սերժ Սարգսյանը հրաժարվեց մասնակցելուց՝ պատճառաբանելով, թե այնտեղ ընդունված բանաձևը ազդում է ԼՂ խնդրի կարգավորման վրա: Քաղաքագետ, Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանի գնահատմամբ, չգնալու վերաբերյալ պաշտոնական հայտարարությունը և իրական պատճառները միմյանցից տարբեր են. «ՆԱՏՕ-ի գլխավոր քարտուղարը հայտարարեց, որ ղարաբաղյան խնդրում ՆԱՏՕ-ն անելիք չունի, չնայած ամիսներ առաջ Բրյուսելում Սերժ Սարգսյանը առաջարկեց ՆԱՏՕ-ին զբաղվել այդ խնդրով: Պաշտոնական հայտարարությունում նշված պատճառաբանությունը ոչ մի բան չէր նշանակում, քանի որ ցանկացած միջազգային կազմակերպություններում արված հայտարարություններում ընդգծվում են երկրների տարածքային ամբողջականությունը, մանավանդ որ եզրափակիչ փաստաթղթում ընդհանրապես գոյություն չուներ Ղարաբաղ տերմինը: Կարծում եմ՝ Լիսաբոն չգնալու մասին որոշումը կայացվել է Մոսկվայում` Սարգսյան-Մեդվեդև հանդիպման ժամանակ: Ավելի շուտ, պատճառները պետք է ՆԱՏՕ-Ռուսաստան հարաբերությունների մեջ տեսնել»:
Ըստ Սարգսյանի՝ ՆԱՏՕ-ի գագաթաժողովին Սերժ Սարգսյանի չմասնակցելու հանգամանքը և դրա հետ կապված ինֆորմացիոն հոսքերը չափազանց խճճված են. «Այսօր արդեն խոսում են, թե ՀՀ պաշտպանության և ԱԳ նախարարները հանդիպել են ՆԱՏՕ-ի գլխավոր քարտուղարի հետ, սակայն հետո դա էլ հերքվեց: Այսինքն՝ մի քիչ անլուրջ վիճակ է ստեղծվել, ինչն էլ Հայաստանի չկողմնորոշվելու արդյունքն է: Եթե որոշումները ընդունվում են ոչ թե երկրում, այլ ուրիշների, մասնավորապես Ռուսաստանի հետ խորհրդակցելով՝ ապա բնական է, որ արդյուքն էլ սա պետք է լիներ: Այստեղ ավելի շատ անսկզբունքայնության նշաններ են դրսևորվում»: