Վերջին տարիներին Եվրոպայում ավելացել են վեներական հիվանդությունների դեպքերը։ Միևնույն ժամանակ, 2000 թ.-ից ի վեր առաջին անգամ որոշ երկրներում սեռական ճանապարհով փոխանցվող հիվանդությունները սկսել են ավելի հաճախ հանդիպել, քան ՄԻԱՎ նոր դեպքերը։
Ինչպես տեղեկացնում է Reuters-ը՝ հղում անելով Հիվանդությունների կանխարգելման և վերահսկման եվրոպական կենտրոնի (ECDC) հաշվետվությանը, սեռական ճանապարհով փոխանցվող հիվանդությունների գրանցված թիվը 2010 թ.-ից բարձրացել է 70 %-ով։ Փորձագետների գնահատմամբ՝ այդ աճը պայմանավորված է չպաշտպանված սեքսի տարածմամբ և ավելի ռիսկային սեռական վարքով գեյերի շրջանում։
ECDC փորձագետ Էնդրյու Ամատո-Գաուչին նշում է, որ սիֆիլիսի դեպքերի ավելացումը Եվրոպայում պայմանավորված է այնպիսի գործոններով, ինչպիսին են սեքսն առանց պահպանակների և սեքսուալ զուգընկերների բազմությունը ՄԻԱՎ-ի հանդեպ վախի նվազման ֆոնին։
Վտանգը մասնավորապես այն է, որ առանց բուժվելու սիֆիլիսը կարող է առաջ բերել լուրջ բարդություններ և դառնալ, օրինակ, մեռած երեխաների ծնվելու պատճառ։ Այսպես, 2016 թ.-ին ամբողջ աշխարհում սիֆիլիսը եղել է երեխային կորցնելու հիմնական պատճառներից մեկը։
2007-2017 թթ. 30 երկրներում գրանցվել է սիֆիլիսի ավելի քան 260 հազար դեպք։ Համաձայն ECDC հաշվետվության, դեպքերի գրեթե երկու երրորդը բաժին է ընկել ոչ ավանդական կողմնորոշում ունեցող տղամարդկանց։ Հետերոսեքսուալ տղամարդկանց շրջանում այդ ցուցանիշը հավասար է եղել 23, իսկ կանանց շրջանում՝ 15 %-ի։
Սիֆիլիսի դեպքերի ավելի քան 80 %-ը գեյերի շրջանում բաժին է ընկել Ֆրանսիային, Գերմանիային, Իռլանդիային, Նիդեռլանդներին, Շվեդիային և Մեծ Բրիտանիային, իսկ մոտ 20 %-ը՝ Լատվիային, Լիտվային և Ռումինիային։
«Այս միտումը կոտրելու համար մարդիկ պետք է մշտապես օգտագործեն պահպանակներ նոր և պատահական զուգընկերների հետ»,- նշում է Էնդրյու Ամատո-Գաուչին։
