Թուրքական Hürriyet թերթի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության հիմնադիր և առաջնորդ, Մարմարա ծովի Իմրալը կղզում ցմահ ազատազրկում կրող Աբդուլլահ Օջալանն իր փաստաբանների միջոցով քրդական «Խաղաղություն ու ժողովրդավարություն» կուսակցության (ԽԺԿ) նորընտիր պատգամավորներին կոչ է արել դադարեցնել խորհրդարանական բոյկոտը և երդում տալ։
Օջալանի հետ հանդիպումից հետո նրա փաստաբանները չեն բացառել, որ ԽԺԿ պատգամավորները կարող են համաձայնության գալ կառավարության հետ և երդում տալ։
Օջալանն իր կոչը պայմանավորել է նրանով, որ հուլիսի 15-ին սպառվում է խորհրդարանական բոյկոտի մասնակիցների վերջնաժամկետը, ինչից հետո նրանք կզրկվեն իրենց պատգամավորական լիազորություններից։
Օջալանը նաև առաջարկել է ստեղծել Սահմանադրական խորհուրդ, որը կզբաղվի նմանատաիպ կարևոր իրավական հարցերի լուծմամբ։
