Միջազգային հանրապետական ինստիտուտը Հայաստանում Հայկական սոցիոլոգիական ասոցիացիայի հետ համատեղ հանրային կարծիքի ուսումնասիրություն է անցկացրել: Սոցիոլոգիական հարցումներն անցկացվել են Երևանում և մարզերում 2019 թվականի մայիսի 6-31- ն ընկած ժամանակահատվածում ընտրելու իրավունք ունեցող 1200 մշտական բնակիչների շրջանում:
Թեմայի շուրջ «Առաջին լրատվական»-ի հետ զրույցում Հայկական սոցիոլոգիական ասոցիացիայի նախագահ Գևորգ Պողոսյանը նշեց, որ սոցիոլոգիական հարցումներն արվել են ԱՄՆ-ի «Գելափ» կազմակերպության լատվիական մասնաճյուղի՝ «Գելափ Բալթիկ Սըրվեյ»-ի և ՄՀԻ-ի հետ: «Հարցումներ անցկացվել են «դեմ առ դեմ» ձևաչափով՝ ընդգրկելով բոլոր մարզերը և Երևանը»: Մեր զրուցակցի հավաստմամբ՝ հարցումներն իրականացվել են հենց այս ժամանակահատվածում՝ հաշվի առնելով, որ հեղափոխությունը բոլորել է մեկ տարին:
«Սոցհարցումը ցույց տվեց, որ իշխանության նկատմամբ վստահություն կա»,- նշեց Գ. Պողոսյանը՝ հավելելով, որ իրեն նույնպես հետաքրքրում էր, թե արդյոք մեկ տարի անց հեղափոխությանը հաջորդած էյֆորիան մարել է, թե ոչ: Նրա խոսքով՝ ինչ-որ չափոփ մարել է, բայց հարցվածների 60 տոկոսը շարունակում է վստահել իշխանությանը և հավատալ, որ նորանոր փոփոխություններ կլինեն:
Եթե ընտրություններն անցկացվեին այս կիրակի, ո՞ւմ կընտրեին. Ըստ հարցումների՝ առաջին տեղում «Իմ քայլն» է՝ 59 տոկոս, երկրորդում՝ ԲՀԿ-ն՝ 12 տոկոս, երրորդում՝ ՀՀԿ-ն՝ 5 տոկոս: Միաժամանակ հարցվածներն ամենամեծ ձեռքբերում են համարում ՀՀԿ-ից ազատվելը, և հարցին, թե որ կուսակցությունների օգտին երբեք չեք քվեարկի, հարցվածների 56 տոկոսը նշել է ՀՀԿ-ին:
Իսկ հարցին՝ որոնք են կառավարության ձախողումները, հարցվածների 22 տոկոսը նշել է վատ կառավարումը:
Ըստ հարցման արդյունքների՝ վարչապետի աշխատակազմի վարկանիշը 72 տոկոս է, ՀՀ նախագահի աշխատակազմի վարկանիշը 85 տոկոսը: «Նիկոլ Փաշինյանի աշխատակազմի վարկանիշն ավելի ցածր է, քան նախագահինը, հիմնականում թիմն է պատճառը, և այն, որ կառավարությունից սպասելիքներն ավելի շատ են, քան նախագահից»,- նշեց Գ. Պողոսյանը:
Մանրամասն՝ տեսանյութում:
