Սաուդյան Արաբիայի իգական սեռի քաղաքացիներն իրավունք կստանան արտասահման մեկնել առանց տղամարդ-խնամակալների թույլտվության:
Նախկինում արտերկիր մեկնելու համար սաուդցի կանայք պետք է թույլտվություն ստանային ամուսնուց, հորից կամ եղբորից:
Նման իրավունքը «հազվագյուտ քայլ է սաուդյան հանրության մեջ արմատավորված արական սեռի տիրապետության դեմ»,- ասվում է The Wall Street Journal պարբերականի հուլիսի 11-ի հոդվածում:
Օրենքի նախագծում նշվում է, որ 18 տարին լրացած կանայք և տղամարդիկ կարող են երկիրը լքել առանց խնամակալի թույլտվության:
Այժմ, Սաուդյան Արաբիայից մեկնելու համար թույլտվություն պետք է ներկայացնեն 21 տարեկանից փոքր տղամարդիկ և ցանկացած տարիքի կանայք:
Սաուդյան Արաբիայում կանանց արդեն թույլատրվել է մեքենա վարել, մարզասրահ հաճախել, բացել սեփական բիզնեսը, ընտրել ծննդաբերության ձևը, աշխատել ռեստորաններում, ինչպես նաև համաձայնել վիրահատության:
Այնուամենայնիվ, Սաուդյան Արաբիայում կանայք իրավունք չունեն ինքնուրույն ամուսնանալ: