Լուրեր
Հրայր Թովմասյանը ակնհայտ ցույց տվեց, որ սպասարկում է Քոչարյանի շահերը
  • 15:58
  • 2019-07-11
  • Դիտումներ՝ *

Սահմանադրական դատարանը հրապարակել է Ռոբերտ Քոչարյանի և մյուսների գործով Երևան քաղաքի առաջին ատյանի ընդհանուր իրավասության դատարանի դատավոր Դավիթ Գրիգորյանի դիմումի վերաբերյալ աշխատակարգային որոշում: ՍԴ-ն որոշել է դատավորի ներկայացրած դիմումի երեք հարցադրումներից երկուսը մերժել, իսկ մեկով՝ Քրեական օրենսգրքի 300.1 հոդվածի 1-ին մասի սահմանադրականության հարցը որոշելու մասով, ընդունել քննության: Թեման քննարկելու համար «Առաջին լրատվական»-ը հյուրընկալել է ՀԱԿ-ի իրավական հանձնաժողովի ներկայացուցիչ Արմեն Խաչատրյանին:

Այս առնչությամբ մեր զրուցակիցն ասաց. «Ռոբասերժադաշնակցական մամուլը անընդհատ թմբկահարում է, որ շուտով կճանաչվի Ռոբերտ Քոչարյանի անձեռնմխելիությունը, սակայն ՍԴ-ն չի քննելու անձեռնմխելիության հետ կապված հարցը»:

Նրա խոսքով՝ սահմանադրական ճգնաժամին ավելացավ ևս մի փոքր դետալ. «Ոչ թե դատավորներն են կայացրել որոշում, այլ այդ դատավորների պաշտոնը ուզուրպացրած մարդիկ, այսինքն՝ որոշում են կայացրել այն մարդիկ, ովքեր որոշում կայացնելու լիազորություն և իրավազորություն չեն ունեցել: Վաղը կարող է Հրայր Թովմասյանը զբաղվել արտաքին քաղաքականությամբ կամ բնապահպանությամբ, և դա կլինի նույնքան տրամաբանական, որքան տրամաբանական է այս դատական ակտը»:

Արմեն Խաչատրյանն ընդգծեց. «Մենք չունենք ՍԴ-ին դիմած դիմում, որով նա պետք է որոշում կայացնի. իրականում դա վերացված որոշում է Վերաքննիչ դատարանի կողմից»:

«Հրայր Թովմասյանը ակնհայտ ցույց տվեց, որ սպասարկում է Ռոբերտ Քոչարյանի շահերը, նա այս որոշմամբ դարձավ Քոչարյանի փաստաբանական խմբի շարքային անդամ»,- հավելեց մեր զրուցակիցը:

 

Հարցազրույցն ամբողջությամբ՝ տեսանյութում:

  • Դիտումներ՝ *