Երկու օր առաջ Ազգային ժողովի արտաքին հարաբերությունների մշտական հանձնաժողովի նախագահ Ռուբեն Ռուբինյանը հայտարարեց, որ ԵԱՀԿ Խորհրդարանական վեհաժողովի նստաշրջանի շրջանակներում հայկական պատվիրակությունը երկու մեծ հաջողություն է գրանցել։ Առաջինը՝ Հայաստանի պատվիրակությունը չեզոքացրել է թուրք և ադրբեջանցի պատվիրակների՝ Հայոց ցեղասպանության ճանաչման կոչ անող պարբերությունը զեկույցից հեռացնելու փորձը, և երկրորդը՝ հայկական պատվիրակությունը կանխել է զեկույցներից մեկում հակահայկական ձևակերպումների ընդունումը։
Առհասարակ, նման զեկույցներն ինչպե՞ս են կազմվում «Առաջին լրատվական»-ի հարցին ԱԺ «Իմ քայլը» խմբակցության պատգամավոր Համազասպ Դանիելյանը պատասխանեց․ «Նախ ասեմ, որ ԵԱՀԿ Խորհրդարանական վեհաժողովն ունի երեք ուղղություններով հանձնաժողովներ։ Յուրաքանչյուր հանձնաժողովում տարվա սկզբին ընտրվում է զեկուցող, որը զեկույց է կազմում, որի հիման վրա կազմում է բանաձևի սևագիր տարբերակ, որի բովանդակության հետ կապված Խորհրդարանական վեհաժողովի պատվիրակները կարող են առաջարկություններ ներկայացնել, խմբագրել և այլն։ Հետևաբար, այն զեկույցը, որ մենք ստացել ենք այսօր, ներկայացված է եղել դեռ ձմռանը՝ Վիեննայում, որտեղ նման տոնայնություն և ձևակերպումներ չկային»։
Ինչպես Վրաստանը, այնպես էլ Ադրբեջանը, հանձնաժողովներում ներկայացվածություն ունի, իսկ ինչո՞ւ Հայաստանը չունի, ինչն է խնդիրը «Առաջին լրատվական»-ի հարցին ԱԺ «Լուսավոր Հայաստան» խմբակցության պատգամավոր Անի Սամսոնյանն ասաց․ «Ես, իհարկե, չեմ կարող հստակ նշել պատճառները, թե ինչու մեր նախորդ պատվիրակությունը չի հոգացել այդ մասին, բայց ակնհայտ է, որ աշխատանք այդ ուղղությամբ չի տարվել։ Պետք է ասեմ, որ այնտեղ ներկայացվածություն ունենալու համար պետք է ոչ միայն սահմանափակվել ազգային օրակարգով, այլ նաև մտնել գլոբալ օրակարգի մեջ՝ բոլորի հետ քննարկել թեմաներ, որոնք հետաքրքրում են բոլորին»։
Մանրամասները՝ տեսանյութում։