Հյուսիսային պողոտայում Փաշինյան-Տուսկ զբոսանքի ժամանակ Քոչարյանի աջակիցների բողոքի ակցիայի ընթացքում տարբեր բացականչություններ հնչեցնողներից՝ Արշակ Սարգսյանը, ով իր «դուխով» լինելն էր ուզում ցուցադրել՝ գոռալով. «Հիմա դո՞ւ ես դուխովը, թե՞ ես», Փաշինյանին էր մեղադրում «Մարտի 1» կազմակերպելու, խաբելու համար, պարզվում է՝ ոչ հեռու անցյալում դատապարտվել է քրեական հանցագործության համար:
Ինչպես տեղեկանում ենք «Դատալեքս» դատական- տեղեկատվական համակարգից, Երևանի Աջափնյակ և Դավթաշեն համայնքների ընդհանուր իրավասության դատարանը Ելիզավետա Դանիելյանի նախագահությամբ 2009 թվականի հունվարի 14-ին քննել է քրեական գործ, որով ամբաստանյալը 1988 թվականին ծնված, այն ժամանակ Երևանի պետական տնտեսագիտական համալսարանի 3-րդ կուրսի ուսանող Արշակ Սարգսյանն էր:
Նրան մեղադրանք էր առաջադրված ՀՀ քրեական օրենսգրքի 116 հոդվածի 2-րդ մասով: Արշակ Սարգսյանը կալանքի տակ էր 2008 թվականի օգոստոսի 29-ից:
Ըստ մեղադրական դատավճռի՝ 2008 թվականի օգոստոսի 29-ին Արշակ Սարգսյանն իր քրոջը հաղորդագրություն ուղարկելու վերաբերյալ պարզաբանում ստանալու նպատակով զանգել է նրա նախկին նշանած Ա. Գ.-ին ու հեռախոսային խոսակցության ժամանակ հայհոյանք է հնչեցրել:
Ա. Գ.-ն այդ մասին ասել է իր եղբայր Տ.-ին, վերջինս իր մորաքրոջ որդու՝ այս գործով տուժող Ռ.-ի, երկու ընկերների՝ գործով տուժողներ Ս.-ի ու Դ.-ի, գործով չպարզված ևս մի քանի տղաների հետ գնացել է Արշակ Սարգսյանի շենքի մոտ:
Պարզաբանումը վերաճել է կռվի, որի ժամանակ, ըստ դատավճռի, Արշակ Սարգսյանը ստացել է առողջության թեթև վնասի հատկանիշներ չպարունակող վնասվածքներ:
Այնուհետև, ըստ դատավճռի, Արշակ Սարգսյանը իր նկատմամբ վիճաբանության մասնակիցների բռնությունը կանխելու նպատակով «կատարել է գործողություններ, որոնք իր համար ակնհայտ՝ չեն համապատասխանել իր նկատմամբ գործադրված ոտնձգության բնույթին ու վտանգավորությանը՝ նա դանակով հարվածներ է հասցրել և անհրաժեշտ պաշտպանության սահմանազանցմամբ Ս.-ի ու Ռ.-ի առողջությանը պատճառել է ծանր վնաս, իսկ Դ.-ի առողջությանը՝ միջին ծանրության վնաս»: Վերջինս կատարվածի վերաբերյալ բողոք չի ներկայացրել, նրա մասով Արշակ Սարգսյանը քրեական հետապնդման չի ենթարկվել:
Դատարանում Արշակ Սարգսյանն իրեն լիովին մեղավոր է ճանաչել երկու հոգու անհրաժեշտ պաշտպանության սահմանազանցմամբ դանակահարելու, ծանր վնասվածքներ պատճառելու համար: Նա միջնորդել է գործը քննել արագացված կարգով:
Դատարանը Արշակ Սարգսյանին մեղավոր է ճանաչել ՀՀ քրեական օրենսգրքի 116 հոդվածի 2-րդ մասով ու դատապարտել է 6 ամիս ազատազրկման:
