Խորհրդարանը պատրաստվում է գնալ արձակուրդի: Հայաստանի համար այս փուլում, երբ տարիների ընթացքում կուտակված խնիրներ կան և, թերևս, անհրաժեշտություն կա արտակարգ ռեժիմով աշխատելու, արդյո՞ք տեղին է օրենսդիր մարմնի արձակուրդի գնալը: Թեմայի շուրջ զրույցում Աժ «Լուսավոր Հայաստան» խմբակցության պատգամավոր Կարեն Սիմոնյանը նշեց, որ դա օրենքի պահանջ է. «Կանոնակարգ սահմանադրական օրենքով ԱԺ պատգամավորը պարտավորված է գնալ արձակուրդի կոնկրետ սահմանված ժամկետում, պատգամավորը չի կարող արձակուրդի գնալ իր ցանկացած ժամանակահատվածում կամ չգնալ: Ոչ ոք չի խանգարում պատգամավորներին, որ գործունեության դաշտը ԱԺ շենքից դուրս տեղափոխվի՝ մարդկանց հետ շփումներ, խնդիրների բարձրաձայնում և այլն:
«Իմ քայլը» խմբակցության պատգամավոր Էդգար Առաքելյանը վստահեցրեց, որ թեև ԱԺ նիստեր չեն լինելու, բայց պատգամավորներից շատերը աշխատելու են:
ԲՀԿ խմբակցության պատգամավոր Սերգեյ Բագրատյանը հավելեց, որ բազում աշխատանքներ կան, որոնք պետք է վերահսկվեն՝ ճանապարհաշինարարական, գյուղատնտեսական և այլն:
Տարածանաշրջանային այցով այսօր Հայաստանում էր ԵԽ նախագահ Դոնալդ Տուսկը. Տուսկի և Փաշինյանի հանդիպման ընթացքում միաժամանակ անջատվեցին Երևանի ՋԷԿ-ը և Հրազդանի 5-րդ էներգաբլոկը և Հայաստանում սկսվեց էլեկտրաէներգիայի քաղց: Սա դավադրությո՞ւն էր, թե՞ ոչ, ի՞նչ կատարվեց այսօր Հայաստանի էներգետիկ համակարգում:
Կ. Սիմոնյանի կարծիքով՝ սա սովորական զուգադիպություն էր, պատահականություն, բայց այն ցույց տվեց, թե ինչքան խոցելի է մեր էներգահամակարգը: Նրա խոսքով՝ խնդիրներ ի հայտ եկան, որոնց պետք է լուծում տալ և ապահովագրվել դրանցից:
Է. Առաքելյանի դիտարկմամբ՝ պարզելու համար՝ սա դիվերսիա էր, թե ոչ, անհրաժեշտ է, որ հետաքննություն իրականացվի, ուսումնասիրություններ պետք է անել՝ առանց բացառելու որևէ վարկած: «Տարածքային զարգացման և ենթակառուցվածքների նախարարությունը պետք է համապատասխան հետևություններ կատարի ավելի ամրապնդելու համար մեր էներգետիկ անվտանգությունը, նաև Երևանի քաղաքապետարանն ու Մետրոպոլիտենը պետք է հետևողական լինեն սնուցման էներգետիկ աղբյուրները դիվերսիֆիկացնելու հարցում, որպեսզի Մետրոպոլիտենը չհոսանքազրկվի:
Սերգեյ Բագրատյանի խոսքով՝ չի բացառվում նաև արտաքին ազդեցությունը: Պատգամավորը նաև ընդգծեց. «Պետք է ունենալ նաև լոկալ էներգահամակարգ. սա մեր իրավասությունների և հնարավորությունների սահամաններում է»:
Մանրամասն՝ տեսանյութում: