Թուրքիան կօգտագործի Ռուսաստանից ձեռք բերված С-400 զենիթահրթիռային համալիրները՝ հարձակման ենթարկվելու դեպքում, հայտարարել է երկրի նախագահ Ռեջեփ Թայիփ Էրդողանը:
«Մենք C-400-ի օգտագործման իրավունք և հնարավորություն ունենք, որտեղ և երբ դրա անհրաժեշտությունը լինի: Մենք կօգտագործենք այս համակարգը, եթե հարձակվեն մեզ վրա: Ահա թե ինչու ենք դրա վրա այդպիսի ներդրումներ արել»,- հայտարարել է Էրդողանը լրագրողներին ինքնաթիռի սրահում, վերադառնալով Բոսնիա և Հերցեգովինայից, հաղորդում է Yeni Safak-ը:
Նա վերահաստատել է, որ խոսք անգամ լինել չի կարող Թուրքիայի կողմից ռուսական ԶՀՀ-երի ձեռքբերումից հրաժարվելու մասին:
Ռուսական նորագույն C-400 ՀՕՊ համակարգերի ձեռքբերումը Թուրքիայի և ԱՄՆ-ի միջև միջազգային սկանդալի պատճառ է դարձել. Նահանգները Թուրքիայից պահանջել են գործարքը չեղարկել և փոխարենը ձեռք բերել իրենց Patriot համալիրները: Վաշինգթոնը գործարքից չհրաժարվելու դեպքում չի բացառել նորագույն F-35 կործանիչների վաճառքը չեղարկելու հնարավորությունը, սակայն Թուրքիան հրաժարվել է զիջումների գնալ: Այնուամենայնիվ, Օսակայում G20-ի ղեկավարների գագաթնաժողովից հետո ԱՄՆ-ի և Թուրքիայի միջև իրավիճակի լարվածությունը նվազել է, հայտարարել է Թուրքիայի արտգործնախարար Մևլյութ Չավուշօղլուն: