Մեկնարկել է ԵՄ խորհրդի նախագահ Դոնալդ Տուսկի այցը տարածաշրջան. երեկ նա Բաքվում էր, իսկ այսօր այցելել է Երևան և հանդիպել ՀՀ վարչապետ Նիկոլ Փաշինյանի հետ: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետներ Ստեփան Սաֆարյանին և Նարեկ Մինասյանին:
Ադրբեջանի նախագահի հետ հանդիպմանը Տուսկը հայտարարել է, որ Եվրամիությունն աջակցում է Ադրբեջանի ինքնիշխանությանը, ազատությանը և տարածքային ամբողջականությանը, ինչը նախկին իշխանությունների որոշ ներկայացուցիչներ փորձեցին ներկայացնել իբրև ներկայիս իշխանությունների հերթական ձախողում: Այս առնչությամբ Ստեփան Սաֆարյանն ասաց. «Այնպես չէ, որ այդ նախադասությունը արժանի չէ ուշադրության, սակայն կոնտեքստից ամեն ինչ կարելի է կտրել. Դոնալդ Տուսկը խոսել է այն մասին, որ հակամարտությունը չի կարող ունենալ որևէ ռազմական լուծում, հարցը պետք է լուծվի քաղաքական եղանակներով, միջազգային սկզբունքների հիման վրա, ընդ որում՝ մատնանշվել է նաև Հելսինկյան եզրափակիչ ակտը»:
Ստեփան Սաֆարյանն ընդգծեց՝ նախկին իշխանությունների քննադատություններն անազնիվ են դառնում, որովհետև նախկինում էլ իրենց էին քննադատում այդ նույն արտահայտության համար. «Այսինքն՝ իրականում որևէ նոր բան չկա: Բայց կա նաև այլ խնդիր՝ ի վերջո Եվրամիությունն ու Ադրբեջանը բանակցում են Շրջանակային համաձայնագրի շուրջ, և դրա, այսպես ասած, արգելակող դրույթներից մեկը քաղաքական մասում հակամարտության կարգավորման դրույթներն են»:
Քաղաքագետը հավելեց, որ Հայաստանի հետ ստորագրված ԵՄ համաձայնագրում ԵՄ-ն ճանաչել է այն, ինչի մասին Տուսկը հայտարարել է թե՛ Բաքվում, թե՛ Երևանում. «Այսինքն՝ հակամարտությունը պետք է լուծվի քաղաքական եղանակով, Մինսկի խմբի շրջանակներում, 3 սկզբունքների հիման վրա: Եվ այդ համաձայնագիրը արդեն իսկ վավերացվել է և վավերացվելու է 28 անդամ երկրների կողմից, որոնց համար ԼՂ կարգավորման այս մոտեցումը դառնում է արդեն աներկբա և անվիճելի»:
Մեր զրուցակցի խոսքով՝ Ադրբեջանում արված հայտարարությունն ընդամենը ռևերանս է Ադրբեջանին, որ ստորագրի համաձայնագիրը. «Բայց ԵՄ-ում հրաշալի գիտեն, որ քաղաքական մասում չեն կարող տալ տարբերվող ձևակերպում, քան դա տրվել է ՀՀ-ԵՄ համաձայնագրում»: Նախկին իշխանության ընդդիմախոսներին վերադառնալով էլ՝ Ստեփան Սաֆարյանն ասաց. «Հարգելիներս, բանակցողները դուք էիք այդ համաձայնագրի, կարողանում էիք՝ ՍԵՊԱ-ում հենց ճանաչել տայիք Արցախի ինքնիշխանությունն ու տարածքային ամբողջականությունը»:
Նարեկ Մինասյանը ևս կարծում է, որ Տուսկի մեսիջները և՛ Երևանում, և՛ Բաքվում նույնն էին. «Հստակ արձանագրվեց, որ հակամարտությունը պետք է ունենա միայն քաղաքական լուծում, որ կարևոր է միջավայրի ձևավորումը բանակցությունների համար»:
Հարցազրույցն ամբողջությամբ՝ տեսանյութում: