Թուրքմենական Աբադան քաղաքում, որը գտնվում է մայրաքաղաք Աշգաբադի մերձակայքում, երեկ զինանոցի պայթյունների հետևանքով ստեղծվել է շատ ծանր իրավիճակ, հարյուրավոր տներ ավերվել են, զոհերի թիվը կարող է հասնել մոտ 100 մարդ: Այս մասին News Asia կայքին ասել են ոչ պաշտոնական աղբյուրները:
Ականատեսները պատմում են, որ Աբադանն ամբողջությամբ այրվում է: «Շարունակվում են պայթել ռումբերը, որոնք սփռված են Աբադանի ողջ տարածքում: Ավերված տների թիվը հասնում է հարյուրների… պայթյունից գետնի տակ է անցել մանկապարտեզը»,- ասել է ականատեսը:
Երեխաներին, որոնք կորցրել են ծնողներին, ողջ քաղաքով մեկ հավաքում են քաղաքի բնակիչները և հանձնում ոստիկանությանը: Զինվորականները հավաքում են ժամկետային զինծառայողների մարմինները, որոնք ծառայություն էին անցկացնում այդ զինանոցի մոտ:
Հիշեցնենք, որ Թուրքմենստանի արտաքին գործերի նախարարությունն այսօր տարածել է հաղորդագրություն, համաձայն որի՝ առանձնակի ավերածություններ, ինչպես նաև զոհեր չկան: