«Վարդա Անյեսի աչքերով» կինոժապավենի ցուցադրությամբ «Ոսկե ծիրան» 16-րդ միջազգային կինոփառատոնի շրջանակում հուլիսի 9-ին մեկնարկեց «Ֆրանսիական նոր կինո» ծրագիրը:
Այս տարի «Ոսկե ծիրան»-ում ներկայացվող 110 ֆիլմից 23-ը ֆրանսիական են կամ ստեղծվել են Ֆրանսիայի հետ համագործակցության արդյունքում:
«Անյես Վարդան ֆրանսիացի մեծ ռեժիսոր է, որը մեզ լքեց իննսուն տարեկանում: Նրա մասին պատմող այս ֆիլմը թույլ կտա նորովի բացահայտել տաղանդաշատ ռեժիսորին ու նրա արվեստը: Վարդային նվիրված ֆիլմով ֆրանսիական ծրագիրը բացելը հարգանքի տուրք է նրան»,- ասաց Հայաստանում Ֆրանսիայի արտակարգ և լիազոր դեսպան Ժոնաթան Լաքոթը:
Դեսպանը շնորհակալություն հայտնեց «Ոսկե ծիրան» կինոփառատոնին` ընդգծելով, որ այն մշտապես մեծ ուշադրություն է դարձնում ֆրանսիական կինոյին:
Նա ընդգծեց, որ «Ոսկե ծիրան»-ը կարևոր կինոփառատոն է, որը հեղինակություն է վայելում ոչ միայն Հայաստանում, այլև միջազգային հարթակում: «Այս փառատոնի շնորհիվ հանրությունը բացահայտում է միջազգային կինեմատոգրաֆիայի բազմազանությունը, որի անբաժան մասն է կազմում ֆրանսիական կինոն»,- նշեց Լաքոթը:
Ժոնաթան Լաքոթը շեշտեց, որ Ֆրանսիայի դեսպանատան հետ համագործակցությամբ Talent Lab ծրագրի շրջանակում վարպետության քառօրյա դասընթաց են անցկացնելու հայտնի կինոքննադատ, Կաննի Critics Week ծրագրի համակարգող Օլիվյե Պելիսոնը, պրոդյուսեր Ֆրանսուա դ՛Արտեմարը:
«Ֆրանսիական նոր կինո» ծրագրի շրջանակում ցուցադրվելու են նաև «Հայեր, արտիստների ժամանակ», «Երիտասարդ աղջկա կերպարը կրակի մեջ» և այլ հեղինակավոր ֆիլմեր:
