Լուրեր
Դավիթ Տոնոյանը չի կատարում իր վերադասի՝ վարչապետի հանձնարարականը. Նախկին զինծառայողը հացադուլ է սկսել
  • 18:15
  • 2019-07-09
  • Դիտումներ՝ *

Նախկին զինվորական Ցոլակ Խաչատրյանն այս օրերին անժամկետ հացադուլ է սկսել կառավարության դիմաց։ Սա վերջին մեկ ամսում արդեն երկրորդ հացադուլի փորձն է։ Զինվորական ծառայությունից 2014 թ.-ին ազատված մայորը պահանջում է, որ պաշտպանության նախարարությունն իրեն վճարի շաբաթ օրերին կատարած աշխատանքի համար, ինչպես նաև չօգտագործած արձակուրդի համար չվճարված գումարները տրամադրի: Խաչատրյանն «Առաջին լրատվական»-ի հետ զրույցում ասաց, որ գումարը բավական մեծ է՝ մոտ 10 միլիոնի հասնող գումարի մասին է խոսքը։

Ցոլակ Խաչատրյանը չօգտագործած արձակուրդի համար չստացած գումարը ստանալու նպատակով ավելի վաղ դիմել էր դատարան, հաղթել առաջին ատյանում, սակայն ՊՆ-ն վերաքննիչ բողոք է ներկայացրել։ «Իմ պահանջն այն է, որ ՊՆ-ն կատարի իր պարտավորությունները։ Այս տարվա մարտի 14-ին ՄԻՊ-ի կողմից հերթական որոշումն է կայացվել՝ կապված իմ խախտված իրավունքների հետ։ Ես այդ որոշումը և իմ դիմումը ներկայացրել եմ կառավարություն, վարչապետի օգնականը ինձ հետ խոսեց, հորդորեց դուրս գալ հացադուլից, քանի որ բոլոր հարցերը լուծվելու են օրինական ճանապարհով։ Բայց առ այսօր որևէ նորություն չկա»,- ասաց Խաչատրյանը։

Նա նշեց, որ 2015 թվականից ՊՆ-ի հետ դատական քաշքշուկների մեջ է, բայց ՊՆ-ն ոչ մի կերպ չի ընդունում իր սխալը և չի վճարում նախկին զինծառայողին հասանելիք գումարները։ Խաչատրյանը նշեց նաև, որ միայն ինքը չի, որ նման հարց է բարձրացնում, պարզապես իր մասով գումարը շատ մեծ է։

Խաչատրյանն ասաց, որ հունիսի 19-ին վարչապետը խիստ հանձնարարական է իջեցրել պաշտպանության նախարար Դավիթ Տոնոյանին և սահմանել տասնօրյա ժամկետ հարցին լուծում տալու համար։ «10-օրյա ժամկետը լրացել է հուլիսի 4-ին, և մինչ օրս Դավիթ Տոնոյանը չի կատարել իր վերադասի ցուցումները։ Եթե մի զինծառայող չկատարեր պաշտպանության նախարարի հրամանը, ապա իրեն ամենայն հավանականությամբ կուղարկեին Սիբիր՝ ձյուն մաքրելու։ Ընդ որում, ամենայն հավանականությամբ՝ ամբողջությամբ»,- ասաց Խաչատրյանը։

 

  • Դիտումներ՝ *