«Առաջին լրատվական»-ի զրուցակիցն է Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը։
– Պարոն Բաբայան, Արցախի ԱԱԾ-ն դիմել է քաղաքական ուժերին՝ նշելով, որ սահմանադրական կարգը խաթարելուն ուղղված բոլոր ոտնձգությունները կստանան պատասխան։ Ի՞նչ մտահոգություններ կան, որ այսպիսի հայտարարության անհրաժեշտություն եղավ։
– Դա հայտարարություն է, որն ուղղված է ընդհանուր բոլորին։ Կարծում եմ՝ այստեղ որևէ մտահոգության ու այլ շահարկումների կարիք չկա։ Ըստ իս՝ բոլոր երկրներում էլ այսպիսի հայտարարություններ լինում են։ Պետք է այս ձևով էլ դիտարկենք, ու իսկապես բոլորի պարտքն է անել ամեն ինչ, որպեսզի իրավիճակը չապակայունանա։
– Իսկ հիմա ապակայունացման փորձեր արվո՞ւմ են։
-Անկախ նրանից՝ արվում են, թե ոչ, այսպիսի հայտարարությունները որևէ ձևով առնվազն չեն խոչընդոտում որևէ մեկին։ Սա պարզապես հայտարարություն է պետական կառույցի կողմից, որը զբաղվում է ազգային անվտանգության պահպանմամբ. այդքան բան։ Իսկ թե ինչ կլինի հետագայում՝ ցույց կտա ժամանակը։ Շատ խնդրահարույց կլինի, եթե որևէ ուժ փորձի ապակայունացնել իրավիճակը։ Դա մի խնդիր է, որից տուժելու են բոլորը, այդ թվում՝ պետությունը, պետական անվտանգությունը։
Ցանկացած երկրում այդպես է, Արցախը բացառություն չէ։
– Այսինքն՝ այս պահին նման փորձեր չե՞ն արվում, և սա ապագայի՞ն միտված հայտարարություն է։
– Իհարկե, լավ կլինի, որ սա իրենցից ճշտեք, բայց քաղաքական առումով սա պարզապես հայտարարություն է, որն այս կառույցն իրավասու է անել։
– Կա տեսակետ, որ սա կոնկրետ Սամվել Բաբայանին ու իր ծավալած գործունեությանն է ուղղված։
– Չեմ կարծում։ Սա պետք է բոլորին ուղղված լինի՝ առանց որևէ կոնկրետ հասցեատիրոջ։ Եթե ինչ-որ մեկը փորձի խարխլել պետական անվտանգությունը, իհարկե պետք է օրենքի շրջանակներում պատասխան տա՝ անկախ նրանից, թե ով է։ Օրենքը բոլորի համար գերակա է, որևէ մեկն արտոնյալ պայմաններ չունի։
– Այսինքն՝ կոնկրետ Սամվել Բաբայանին ուղղված չէ։
– Ընդհանուր է, չեմ կարծում, թե կոնկրետ ինչ-որ մեկին է ուղղված։ Սա ուղղված կլինի այն մարդկանց ու անհատներին, ովքեր կփորձեն ապակայունացնել իրավիճակը։ Եթե այդպիսի փորձեն չեն անի, բնականաբար իրենց ուղղված չէ։
– Իսկ նախընտրական ընդհանուր իրավիճակն ինչպե՞ս կբնութագրեք, իրավիճակը քաղաքական առումով հանգի՞ստ է։
– Ընդհանուր իրավիճակը հանգիստ է։ Ավելի ակտիվացել է Տեղական ինքնակառավարման մարմինների՝ Ստեփանակերտում և մի շարք համայնքներում տեղի ունեցող ընտրությունների ֆոնին։ Գիտեք՝ քաղաքական դաշտն է վերակազմավորվում։ Բայց այս պահի դրությամբ որևէ տագնապալից մտահոգություններ չկան։ Թե ինչ կլինի ապագայում՝ կտեսնենք, բայց այս պահի դրությամբ ամեն ինչ նորմալ է։
Լուսանկարը՝ panorama.am-ի