«Եթե որևէ մեկը հույս էր դրել նախկին քրեաօլիգարխիկ համակարգի հիմնադիր հայրերի բարոյականության վրա, ապա այդ մեկը թերևս վարչապետ Փաշինյանն էր և իր թիմը. այլ ուժերը հույս չեն ունեցել, որ նման դեստրուկտիվ ուժերը կարող են բարոյականություն ունենալ և չպայքարել,- «Առաջին լրատվական»-ի հետ զրույցում ասաց քաղաքագետ Հայկ Մարտիրոսյանը:
Նա հավելեց, որ նոր ղեկավարությունը, որի ձեռքին կային բոլոր լծակները՝ պրոցեսներն այլ ուղով տանելու, կտրուկ գործողություններով քաղաքական ասպարեզից իսպառ և առհավետ հեռացնելու նախկին ռեժիմին և իրենց մնացորդներին, չարեց իր ֆունկցիան. «Եվ հիմա նրանք նոր դեմքերով, նոր ուժերով, նոր թափով և նոր սատարմամբ, այդ թվում՝ ոչ միայն ներքին, դուրս են եկել պայքարի, ինչը տրամաբանական է»:
Հայկ Մարտիրոսյանի կարծիքով՝ խաղաղ պայմաններում նախկին ռեժիմն աշխատում է պալատական հեղաշրջման ուղղությամբ. «Այս սցենարի դեպքում իշխանության մեջ կգտնվեն մարդիկ, ովքեր մեծ սիրով կհամագործակցեն ոչ միայն ներքին, այլև արտաքին որոշակի ուժերի հետ: Եվ երբ Փաշինյանին սատարողների նվազող բանակը զրոյանա, չի բացառվում խորհրդարանական հեղաշրջումը, որը հենց պալատական հեղաշրջում կլինի՝ նույն «Իմ քայլի» տարբեր թևերի, խորհրդարանական այլ կուսակցությունների կողմից»:
Քաղաքագետն ընդգծեց. «Մի բան պարզ է և հստակ՝ այսպես շարունակելու պայմաններում ներկայիս իշխանությունը չի կարող մնալ իշխանության»:
Քաղաքագետը խայտառակություն է որակում այն, որ նախկին քաղաքական գործիչները, որոնք վաղուց պետք է քաղաքական ասպարեզից հեռացած լինեին և բանտերում իրենց պատիժները կրեին, դարձել են քաղաքական գործոն. «Սա նշանակում է ժողովրդական հեղափոխության դավաճանություն հեղափոխության առաջնորդների կողմից, որոնք վիճակը շտկելու փոխարեն՝ ավելի բարդացրել և խճճել են այն»:
Նրա խոսքով՝ Փաշինյանը երկրում ստեղծել է մի իրավիճակ, երբ շունը տիրոջը չի ճանաչում:
Հարցազրույցն ամբողջությամբ՝ տեսանյութում:
