Նախորդ տարվա հունվարի 1-ի դրությամբ անցումային գերավճարի գծով մնացորդը կազմել է 132,7 միլիարդ դրամ, 2019 թվականի հունվարի 1-ի դրությամբ այն կրճատվել էր՝ հասնելով 69,6 միլիարդի, իսկ 2019 թվականի հուլիսի 1-ի դրությամբ այն կազմում է 43 միլիարդ դրամ։
Այս մասին հուլիսի 9-ին մամուլի ասուլիսում ասաց Պետական եկամուտների կոմիտեի նախագահ Դավիթ Անանյանը:
«Սա այն գումարն է, որ մինչև 2018 թվականի հունվարի 1-ն ընկած ժամանակաշրջանում հարկ վճարողներից կանխավճարների տեսքով հավաքվել էր և մատուցվել որպես հարկային եկամուտ։ Քանի որ հարկային եկամուտների հաշվառման մեթոդաբանությունը փոխվեց 2018 թվականի հունվարի 1-ից, մենք ուղղակի այս ցուցանիշը կրճատում ենք»,- ասաց Անանյանը։
Նա հավելեց, որ ՊԵԿ-ի որդեգրած այն քաղաքականությունը, որ պետք է անշեղորեն գնալ գերավճարների կամ նախկինում գանձված կանխավճարների կրճատման ճանապարհով, ըստ էության, իրականացվում է։