Երևանի պետհամալսարանի ռեկտոր վերընտրված Արամ Սիմոնյանից լրագրողները հետաքրքրվել են՝ինչի՞ արդյունք է վերջինիս վերընտրվելը, և ինչո՞ւ չեղան այլ թեկնածուներ։ «Դժվարանում եմ պատասխանել, որովհետև իմ խնդիրը չէ, և ես չեմ կարող ուրիշների համար մեկնաբանել, թե ինչու ցանկություն չունեցան»,- ասել է Արամ Սիմոնյանը՝ ավելացնելով, որ այդտեղ ոչ մի տարօրինակ բան չի տեսնում: Արամ Սիմոնյանի խոսքերով՝ սա յուրաքանչյուրի ընտրության գործն է. «Մրցույթը եղել է բաց, թափանցիկ, գործերը նախապես հանձնվում էին ԿԳ նախարարություն, իսկ թե ինչու, ինձնից բացի, ոչ ոք ցանկություն չի հայտնել գործերը հանձնել՝ դժվարանում եմ պատասխանել»:
Նրա խոսքերով՝ ընտրությունները իրականացվել են կանոնակարգի և ռեկտորի ընտրությունների ընթացակարգի համաձայն, որը հաստատվել է հինգ տարի առաջ, և, բնականաբար, ընթացել են կարգին համապատասխան: Իսկ թե ինչի արդյունք է իր վերընտրվելը՝ Արամ Սիմոնյանը զարմացած պատասխանել է՝ փակ գաղտնի քվերակության:
«Գուցե լավ աշխատանքի՞»,- հարցրել է լրագրողներից մեկը: Արամ Սիմոնյանը պատասխանել է, որ, դատելով որոշ ԶԼՄ-ների հոդվածներից, ինքը լավ չի աշխատում, բայց, օրինակ, դատելով համալսարանականների կարծիքից, մանավանդ կառավարման խորհրդի քվեարկության արդյուքներից, ինքը ինչ-որ արժանիքներ ունի. «Ինչ-որ աշխատանքներ տվել են արդյունք, որ ինձ ընտրել են, թե չէ, հավատացեք, ինձ ուրիշ բարեմասնությունների համար ռեկտոր չէին ընտրի»,- հավելել է ԵՊՀ ռեկտորը: