ՀՀ ԱԺ արտաքին հարաբերությունների մշտական հանձնաժողովի պատվիրակությունը, Ռուբեն Ռուբինյանի գլխավորությամբ, հուլիսի 2-4-ը Վարշավայում էր՝ Լեհաստանի Հանրապետության Սենատի արտաքին հարաբերությունների և ԵՄ հարցերով հանձնաժողովի հետ համատեղ նիստի աշխատանքներին մասնակցելու համար: Այս այցից առաջ պատվիրակությունը խորհրդարանական այցերի շրջանակում եղել է նաև Մոսկվայում:
«Ե՛վ Լեհաստան, և՛ Ռուսաստան կատարած այցերը համատեղ նիստերի ֆորմատով էին, այս ֆորմատները կային նաև նախորդ գումարման ԱԺ-ի ժամանակ. Ռուսաստանի հետ համատեղ տարին երկու անգամ է տեղի ունենում, նիստերից մեկը՝ Երևանում, մյուսը՝ Մոսկվայում, իսկ Լեհաստանի հետ՝ տարին մեկ անգամ՝ մե՛կ Հայաստանում, մե՛կ Լեհաստանում»,- թեմայի շուրջ «Առաջին լրատվական»-ի հետ զրույցում այս մասին ասաց ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը՝ հավելելով, որ այս անգամ նիստերը հայաստանյան պատվիրակության համար առաջին հերթին ճանաչողական էին, և երկրորդ՝ հարմար ձևաչափեր են՝ բազմակողմ կապեր հաստատելու և հարցեր քննարկելու համար:
Ռ. Ռուբենյանի գնահատմամբ՝ լեհաստանյան այցը շատ հաջողված էր, հաստատվել են կարևոր կապեր: Նրա խոսքով՝ նախատեսվում են այս ձևաչափով հանդիպումներ կազմակերպել նաև այլ երկրների հետ:
Հիշեցնենք՝ համատեղ նիստի ընթացքում հայ և լեհ պատգամավորները հանդես են եկել զեկույցներով՝ ՀՀ-ԵՄ հարաբերությունների, տարածաշրջանային անվտանգության և Հարավային Կովկասում համագործակցության ու կայունության հարցերի, ինչպես նաև հայ-լեհական երկկողմ հարաբերությունների վերաբերյալ:
Մեր զրուցակիցն անդրադարձավ նաև Արցախի վերաբերյալ մի շարք հարցերի: Նա ընդգծեց, որ Ղարաբաղյան հակամարտությունը արցախցիների ճակատագրին է վերաբերում, և անտրամաբանական կլինի, եթե Արցախը ներկայացուցիչ չունենա բանակցություններում. «Առանց Արցախի ներգրավման բանակցությունները չեն հաջողի»:
Մանրամասն՝ տեսանյութում:
