«Երկխոսությունն ընթանում է, բավականին հետաքրքիր քաղաքական նոր մշակույթ է ձևավորվում Հայաստանում:
ՀԱԿ-ն իր պահանջներն է ներկայացնում, իշխանություններն էլ, բնականաբար, իր պահանջները պետք է ունենա: Իրենք իշխանության ներկայացրած ցանկացած տարբերակը մերժում են, սա օբյեկտիվ իրականություն է: Ի վերջո, ընտրությունները մոտենում են և եթե կարծում եք, որ այս երկխոսությունը պետք է յուղի նման գնա, ապա չարաչար սխալվում եք»,- այսօր լրագրողների հետ հանդիպման ժամանակ, խոսելով ՀԱԿ-իշխանություն երկխոսության մասին, կարծիք հայտնեց ԱԺ ՀՀԿ խմբակցության պատգամավոր Համլետ Հարությունյանը:
Հարությունյանը նկատեց, որ շատ բնական է, որ ՀԱԿ-ը խոսում է արտահերթ ընտրությունների մասին. «Դուք ասում եք արտահերթ ընտրություններ, ես դրա մեջ վատ բան չեմ տեսնում, շատ էլ ճիշտ են անում, բա դուք էլ ի՞նչ ասեք, հո Փարիզի կոմունայի «եղբայրություն, հավասարություն», կամ էլ «ամբողջ իշխանությունը սովետներին» լոզունգներով չպիտի առաջ գնաք: Բա ինչ լոզունգով ապացուցեն այդ մարդիկ իրենց գոյությունը»:
Հարությունյանի կարծիքով, երկխոսության որոշակի վիժեցման օբյեկտիվ ձգտումներ կան հենց ընդդիմությունից`իր դեմքը պահելու համար. «Ես էլ լինեմ իրենց տեղը այդպես կվարվեմ: Մենք հենց որ ընդառաջում ենք, իրենց դա ձեռք չի տալիս: Ընդառաջում ենք ժողովուրդն ասում է՝ պահո՜, ՀԱԿ-ը իշխանության տակ պառկել է: Սա շատ օբյեկտիվ քաղաքական զարգացում է»: