Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է անչափահաս Վ. Ք.-ի գործի դատական քննությունը:
17-ամյա Վ.-ն դեպքի պահին սովորում էր մարզի գյուղերից մեկի դպրոցի 11-րդ դասարանում:
Նրան մեղադրանք էր առաջադրվել ՀՀ քրեական օրենսգրքի 235 հոդվածի 4-րդ մասով: Ըստ մեղադրանքի՝ անչափահաս Վ.-ն թույլ է տվել «Զենքի մասին» ՀՀ օրենքի 6-րդ, 13-րդ հոդվածների դրույթների խախտում: Համաձայն հիշյալ դրույթների՝ ՀՀ տարածքում արգելվում է որպես քաղաքացիական զենք՝ շրջանառության մեջ մտցնել կռփազենք (կաստետ)… Քաղաքացիական զենք ձեռք բերելու իրավունք ունի ՀՀ 18 տարին լրացած քաղաքացին:
Ըստ մեղադրանքի՝ 17-ամյա դպրոցական Վ. Ք.-ն 2018 թվականին՝ գործով չպարզված օրը, Ալավերդի քաղաքի խանութներից մեկից ձեռք է բերել սառը զենք հանդիսացող կոմբինացված, սևեռվող շեղբով ծալովի դանակ-կռփազենք (կաստետ), որի դանակը սառը զենք չի հանդիսանում, իսկ բռնակը հարվածող-փշրող սառը զենք է՝ կռփազենք: Ձեռք բերած սառը զենքը անչափահաս տղան կրել է վերարկուի գրպանում՝ դրանով, ըստ մեղադրանքի, իրական հնարավորություն է ստեղծել այն հանցավոր նպատակով օգտագործելու համար:
Ըստ դատական ակտի՝ 2019 թվականի փետրվարի 19-ին, ժամը 9-ն անց 30-ի սահմաններում Վ. Ք.-ն Լոռու մարզի գյուղերից մեկի դպրոցի 11-րդ դասարանում՝ դասի ժամանակ, իր կողմից ապօրինի կրած, կոմբինացված սառը զենքի սևեռվող շեղբով համադասարանցի Ա. Թ.-ի առողջությանը պատճառել է միջին ծանրության վնաս՝ առողջության տևական քայքայումով:
Սառը զենք հանդիսացող կռփազենքը վերցվել է ոստիկանության աշխատակիցների կողմից՝ դեպքի հաջորդ օրը կատարված դեպքի վայրի զննությամբ:
Քննիչի որոշմամբ՝ համադասարանցու առողջությանը միջին ծանրության վնաս հասցնելու համար անչափահաս Վ. Ք.-ի նկատմամբ քրեական հետապնդում չի իրականացվել՝ տուժողի բողոքի բացակայության հիմքով:
ՀՀ քրեական օրենսգրքի 235 հոդվածի 4-րդ մասով առաջադրված մեղադրանքում Վ. Ք.-ն իրեն լիովին մեղավոր է ճանաչել:
Նա հայտնել է, թե ծնողները բաժանված են: Հայրը գտնվում է Ռուսաստանում, մայրը՝ Լոռու մարզի մեկ այլ գյուղում, իսկ ինքը բնակվում է տատիկի գյուղում՝ տատիկի հետ: Մոր հետ կապված է, մայրը զբաղվում է իր դաստիարակությամբ: Տատիկի գյուղում է ինքը դպրոց գնում, սովորում է 11-րդ դասարանում, ունի միջին առաջադիմություն:
Դեպքից որոշ ժամանակ առաջ Ալավերդու խանութներից մեկից 4 հազար դրամով գնել է դանակ-կաստետ, որն օգտագործել է տանը՝ կենցաղային նպատակներով:
2019 թվականի փետրվարի 19-ի առավոտյան՝ ժամը 9-ն անց 30-ին, ինքը դպրոցում էր, նստած էր դասարանում:
Դասի ժամանակ ինքն ու ընկերը՝ Ա. Թ.-ն, կատակում էին, ինքը նրան կատակով անվանել է «Վագրիկ», իսկ նա իրեն անվանել է «Չալիկ»:
Ինքը դա վիրավորական է համարել ու դանակ-կաստետով հարվածել է դասընկերոջ աջ ոտքին: Վերջինս դասարանից դուրս է եկել, ինքն էլ է դուրս եկել ու գնացել է նրա հետևից: Դպրոցի զուգարանում ինքը Ա.-ին օգնություն է ցույց տվել, հետո վերադարձել են դասարան: Երկրորդ դասը վերջանալուց հետո Ա.-ին ճանապարհել է տուն:
Վ.-ն պնդել է, թե զղջում է, հասկանում է կատարած սխալը:
Տուժողը հայտնել է, թե դասի ժամանակ Վ.-ի կողմից իր ոտքին դանակի հարված հասցնելուց հետո ինքը գնացել է դպրոցի զուգարան: Ոտքի վերքն արյունահոսել է, Վ.-ն ու մի քանի դասընկերներ դադարեցրել են արյունահոսությունը: Ինքը դասի ավարտից հետո գնացել է տուն, հետո իրեն տարել են հիվանդանոց:
Տուժողը հայտնել է, թե Վ. Ք.-ից բողոք, պահանջ չունի:
Այսպիսով, դեպքը տեղի է ունեցել դպրոցում, այն էլ՝ դասի ժամանակ: 11-րդ դասարանում յդ պահին դաս էր անցկացնում հասարակագիտության ու պատմության տղամարդ ուսուցիչը: Նա հայտնել է, թե դեպքի օրը առաջին երկու դասաժամերը 11-րդ դասարանում իրենն էին: Առաջին ժամին հանկարծ աշակերտներից՝ Ա. Թ.-ն, այնուհետև Վ. Ք.-ն ու ևս մի քանիսը առանց թույլտվություն հարցնելու դասարանից դուրս են եկել: Ինքը դասը շարունակել է…
Միայն դասամիջոցին է իմացել, որ Ա. Թ.-ի ոտքը դասի ժամանակ վնասվել է: Վ. Ք.-ն հայտնել է, թե ինքն է վնասել ընկերոջ ոտքը մոտը եղած դանակ-կաստետով: Ինքը մի աշակերտի կողմից մյուսին դանակով վնաս հասցնելը… չի տեսել՝ «ականատես չի եղել», քանի որ… զբաղված է եղել գրատախտակին դասը գրելով… Դեպքին նախորդող պահին դասարանում քաշքշուկ, կռիվ չի եղել: Վ. Ք.-ն իրեն դրսևորել է «պարկեշտ», իր գործողություններով «չի խախտել դասը, անհարգալից վերաբերմունք ցույց չի տվել ներկաների նկատմամբ, հայհոյանքներ չի հնչեցրել…»:
Դեպքի վայր հանդիսացող դասարանի զննության ժամանակ Վ. Ք.-ն իրավապահներին է ներկայացրել դանակ-կռփազենքը, որն առգրավվել և իրեղեն ապացույց է ճանաչվել:
Դատաբժշկական փորձաքննության եզրակացության համաձայն՝ տուժող անչափահասին պատճառվել է աջ ազդրի ծակած-կտրած վերք՝ խորանիստ մկանների վնասումով:
Նշենք, որ ազդրի շրջանում դանակով վնասվածք հասցնելը կարող էր ողբերգական ավարտ էլ ունենալ, եթե վնասվեր զարկերակը, մի բան, որ երբեմն պատահում է նմանատիպ կռիվ-միջադեպերի ժամանակ…
Դատարանը հաշվի է առել, որ Վ. Ք.-ն հանցավոր արարքը կատարել է անչափահաս տարիքում՝ 17 տարեկանում:
Անչափահաս Վ. Ք.-ն մեղավոր է ճանաչվել ՀՀ քրեական օրենսգրքի 235 հոդվածի 4-րդ մասով: Դատարանը նրան ազատել է քրեական պատասխանատվությունից, նրա նկատմամբ կիրառել է դաստիարակչական բնույթի հարկադրանքի միջոց՝ տեղական ինքնակառավարման մարմնի վերահսկողությանը հանձնելը 6 ամիս ժամկետով: Տղայի վարքագծի նկատմամբ վերահսկողությունը դրվել է համապատասխան քաղաքապետարանի վրա:
