Դիլիջանը, ըստ քաղաքապետ Արմեն Սարթոսյանի, մինչև 2013 թ.կդառնա Հայաստանի ֆինանսական կենտրոնը։ Այսօր լրագրողների հետ հանդիպման ժամանակ Սարթոսյանը հայտնեց, որ ավարտվել են Կենտրոնական բանկի շենքի կառուցման աշխատանքները։ Շուտով քաղաքում գործող 3 բանկերին կավելանան ևս 3-ը։
Մինչև 2013 թ. նախատեսվում է Կենտրոնական բանկի աշխատակիցների երեխաների համար կառուցել մանկապարտեզ, դպրոց և համալսարան՝ հավանաբար ԵՊՀ-ի հետ համատեղ, տեղեկացնում է Արմեն Սարթոսյանը։ Կենտրոնական բանկի բնակելի թաղամասը տուն կդառնա 250 ընտանիքների համար։
Քաղաքում ծրագիրն իրականացնելու համար ներդրումներ անում է ոչ միայն պետությունը, այլև մասնավոր սեկտորը։ «Պետական բյուջերից մոտ 300-400 մլն դրամ տրամադրվել է դպրոցների, հիվանդանոցի վերակառուցմանը։ Եկող տարվա պլանով 1.5 միլիոն ԱՄՆ դոլար է տրամադրվել քաղաքի ճանապարհների վերակառուցման համար»,- ասում է քաղաքապետը։ Իսկ Կենտոնական բանկի ծրագիրը պահանջել է 80 միլիոն դոլար։