ՀՀ Ազգային ժողովի արտաքին հարաբերությունների մշտական հանձնաժողովի պատվիրակությունը՝ Ռուբեն Ռուբինյանի գլխավորությամբ, հուլիսի 2-4-ը մեկնել էր Վարշավա՝ Լեհաստանի Հանրապետության Սենատի արտաքին հարաբերությունների և Եվրամիության հարցերով հանձնաժողովի հետ համատեղ աշխատանքներին մասնակցելու։
Ի՞նչ օրակարգով էիք մեկնել Լեհաստան «Առաջին լրատվական»-ի հարցին ԱԺ «Իմ քայլը» խմբակցության պատգամավոր Անուշ Բեղլոյանը պատասխանեց․ «Մեր նպատակն էր հանդիպել և քննարկել Արևելյան գործընկերության ապագան ու հեռանկարները։ Հանդիպեցինք Լեհաստանի խորհրդարանի երկու պալատների՝ Սենատի և Սեյմի ներկայացուցիչների հետ, ինչպես նաև հանդիպումներ ունեցանք Լեհաստանի արտգործնախարարության պաշտոնյաների և Արևելյան հետազոտությունների ինստիտուտի ներկայացուցիչների հետ։ Նշված ինստիտուտը հիմնվել է Տադեուշ Մազովեցկիի կողմից և զբաղվում է վերլուծություններով, որոնք վերաբերում են տարածաշրջանում և Արևելյան գործընկերության երկրներում տեղի ունեցող քաղաքական պրոցեսներին»։
Իսկ հարցերի ի՞նչ շրջանակի է հաջողվել անդրադառնալ այցի ընթացքում «Առաջին լրատվական»-ի հարցին ԱԺ «Իմ քայլը» խմբակցության պատգամավոր Սոս Ավետիսյանն ասաց․ «Հարցերի շրջանակը բավականին լայն էր, բայց նաև որոշակի առումով թիրախավորված։ Առաջնայինը ՀՀ-ԵՄ հարաբերությունները կարգավորող փաստաթուղթը՝ Սեպան, վավերացնելն էր և վիզաների ազատականացման հարցը։ Այս երկուսը միմյանց հետ փոխկապակցված չեն, բայց ունեն որոշակի կապ։ Երկրորդը՝ տարածաշրջանային անվտանգությանը վերաբերող հարցերն էին․ Լեռնային Ղարաբաղի հակամարտության բացառապես խաղաղ կարգավորման և բալանսավորված մոտեցումը մեր գործընկերների կողմից։ Նաև շատ կարևոր էր հայ-լեհական հարաբերությունների ամբողջ խորությունը վերաիմաստավորել և դիտարկել, թե կոնկրետ որ ուղղություններով և ինչ ծրագրերով մենք կարող ենք առաջ գնալ և զարգացնել մեր հարաբերությունները Լեհաստանի հետ»։