Ադրբեջանական APA լրատվական գործակալության փոխանցմամբ՝ Ռուսաստանի ԱԳՆ ներկայացուցիչ Ալեքսանդր Լուկաշևիչն այսօր կայացած ճեպազրույցի ժամանակ հայտարարել է, որ ԵԱՀԿ Մինսկի խմբի առկա ձևաչափը և Ռուսաստանի, ԱՄՆ–ի ու Ֆրանսիայի միջնորդական գործունեությունը հիմնախնդրի կարգավորման արդյունավետ և բավական գործունակ միջոցներ են.
«Ոչ վաղ անցյալում Կազանում տեղի ունեցած Ռուսաստանի, Հայաստանի և Ադրբեջանի նախագահների եռակողմ հանդիպումը առաջընթաց գրանցելու հույս տվեց այդ դժվարին գործընթացում։ Խոսքը հիմնարար սկզբունքների համաձայնեցման և բանակցային ավելի բարդ գործընթացին՝ խաղաղության համաձայնագրի մշակմանն անցում կատարելու մասին է։
ԵԱՀԿ Մինսկի խմբի ձևաչափը պահպանվում է երկար տարիներ՝ 1990-ական թվականների սկզբից։ Չնայած հակամարտության զարգացման տարբեր ժամանակաշրջաններին՝ ԵԱՀԿ Մինսկի խմբի պոտենցիալը դեռևս չի օգտագործվել. համանախագահները փորձում են գործել պատասխանատու և ինտենսիվ՝ անհրաժեշտ պայմանավորվածությունների հասնելու հարցում Երևանին ու Բաքվին օգնելու համար»։