Wikileaks կայքն այսօր տեսահոլովակ է տեղադրել իր կայքում, որում ակնարկ կա, որ կայքի հիմնադիր Ջուլիան Ասանժը մասնակցություն է ունեցել Հոսնի Մուբարաքի ռեժիմի տապալման գործում: Այս մասին The New York Times-ի իր բլոգում գրել է Ռոբերտ Մաքքին: Տեսահոլովակում կարելի է տեսնել, թե ինչպես է Ասանժը դիտում եգիպտոսի դեպքերի կադրերը, իսկ տեքստն ասում է, որ «մարդկանց մի մասը չի սիրում փոփոխություններ, մնացյալի համար կա Wikileaks-ը»:
Մաքքին հիշեցնում է, որ 2010 թ. վերջին Wikileaks-ը կայքում տեղադրել էր որոշ փաստաթղթեր, որոնցում բացահայտումներ կային Մուբարաքի ներքին քաղաքականության մասին: Մինչդեռ The Christian Science Monitor-ը գրել է, որ եգիպտացի ակտիվիստներն այս ամենի հետ համաձայն չեն: @alaa անվան տակ գրող ակտիվիստն ասել է, որ գուցե Թունիսի դեպքում Wikileaks-ի բացահայտումներն օգտակար էին, սակայն Եգիպտոսի վերաբերյալ հրապարակումները չէին կարող զգալի ազդեցություն ունենալ, քանի որ մինչև դրանց հայտնվելն էլ շատ եգիպտացիների հայտնի էին դրանցում նշված փաստերը: «Եգիպտացիները բազմաթիվ պատճառներ ունեին ապստամբելու Մուբարաքի դեմ և գահընկեց անելու նրան՝ իր փտած, կոռումպացված ռեժիմի հետ: Նրանք չէին սպասում Wikileaks-ին»,- ասել է նա: Նմանատիպ դիրքորոշում ունեն նաև թունիսցի հեղափոխականները:
Մինչդեռ շաբաթ օրը Ասանժը հայտարարել է, որ իր կողմից հրապարակված փաստաթղթերը թունիսցիներին և եգիպտացիներին նոր տեղեկություններ են հաղորդել իրենց երկրներում կաշառակերության մասին, ընդ որում՝ դրանց միջոցով հայտնի է դարձել, որ այդ արատների մասին գիտեն նաև Եվրոպայում և Ամերիկայում: Ասանժը եզրակացնում է, որ սրանով Բեն Ալիի և Մուբարաքի՝ Արևմուտքի աջակցությունը ստանալու ճանապարհները փակվել են: