Հուլիսի 7-ին Նիոնում տեղի ունեցավ ֆուտզալի աշխարհի առաջնության ընտրական մրցաշարի Եվրոպական գոտու նախնական և գլխավոր փուլերի վիճակահանությունը: Նախնական փուլում 20 թիմ բաժանվեցին 5 խմբի:
Հայաստանի ֆուտզալի հավաքականը ընդգրկվեց Ա խմբում որտեղ կմրցի Վրաստանի, Մոլդովայի և Մալթայի ընտրանիների հետ: Խմբային մրցաշարը տեղի կունենա Վրաստանում ս.թ. հոկտեմբերի 19-ից 23-ը: Այս մասին տեղեկացնում է ՀՖՖ մամուլի ծառայությունը:
Խմբերի հաղթողները և երկրորդ տեղ զբաղեցրած երկու լավագույն թիմերը կմիանան ևս 21 հավաքականի, որոնք գլխավոր փուլի յոթ խմբերում կխաղարկեն Աշխարհի առաջնության եզրափակիչ փուլի նույնքան ուղեգիր:
Եթե Հայաստանի ընտրանին իր խմբում զբաղեցնի առաջին տեղը, ապա կհայտնվի 3-րդ խմբում Սլովենիայի (կազմակերպիչ երկիր), Սերբիայի և Իսրայելի հավաքականների հետ մեկտեղ: Լավագույն երկրորդ տեղերից մեկը զբաղեցնելու դեպքում մեր մրցակիցները կլինեն. 1-ին խմբում` Իսպանիան, Բելգիան և Բոսնիան (կազմակերպիչ երկիր) կամ 4-րդ խմբում` Պորտուգալիան (կազմակերպիչ երկիր), Սլովակիան և Լիտվան:
Նշենք, որ 2012 թ. ֆուտզալի աշխարհի առաջնությունը կանցկացվի Թայլանդում նոյեմբերի 2-ից 18-ը:
