Հուլիսի 4-ին՝ ժամը 14։40-ի սահմաններում, ոստիկանության Մաշտոցի բաժին ահազանգ է ստացվել Երևան քաղաքի Նորաշեն թաղամասի շենքերից մեկի բնակչուհուց, ով հայտնել է, որ իր տան վրա հարձակում է եղել, հայտնում է SHAMSHYAN.com-ը։
Ոստիկանները նշված վայրից վիճաբանություն կատարելու կասկածանքով Մաշտոցի բաժին են ներկայացրել նույն թաղամասի բնակիչ 17-ամյա Է․Հ-ին։
Ըստ նախնական տեղեկությունների՝ վիճաբանություն է տեղի ունեցել ահազանգող քաղաքացուհի Վ․Ծ-ի ամուսնու՝ նույն հասցեի բնակիչ 47-ամյա Արման Հակոբյանի հետ, որի ժամանակ Է․Հ-ն հարվածել է Վ․Ծ-ին և Ա․ Հակոբյանին՝ պատճառելով վնասվածքներ։
Արդեն ոստիկանությունում Է․Հ-ն հայտնել է, որ Ա․ Հակոբյանը մինչ այդ ձեռքերով հարվածել է իրեն՝ պատճառելով ֆիզիկական ցավ, իսկ վիճաբանության ժամանակ Ա․ Հակոբյանի մտերիմներից մեկն էլ հարվածել է իր գլխին։
Փաստի առթիվ նյութեր են նախապատրաստվում, նշանակվել է դատաբժշկական փորձաքննություն։
Աղբյուրի փոխանցմամբ՝ Ա․ Հակոբյանն աշխատում է ՀՀ գլխավոր դատախազությունում՝ մինչդատական քրեական վարույթի օրինականության վերահսկողության բաժնի պետի տեղակալ։