«Առաջին լրատվական»-ի զրուցակիցն է «7»-ի գործով նախկին քաղբանտարկյալ, ԵԿՄ վարչության անդամ :
– Պարոն Հակոբյան, նախօրեին ԵԿՄ վարչության նախագահ, «Իմ քայլը» խմբակցության պատգամավոր Սասուն Միքայելյանը խոսում էր իշխանության ներսում, մասնավորապես «Քաղաքացիական պայմանագիր» կուսակցության ներսում առկա հակասությունների, տարաձայնությունների մասին: Ձեր կարծիքով՝ որքա՞ն խորն ու վտանգավոր են այդ հակասությունները և ինչի կարող են հանգեցնել: Սասուն Միքայելյանը խոսում էր թավշյա հեռացման հեռանկարի մասին:
– Վտանգավոր ոչ մի բան չկա: Լարվածություն կա, որը կհարթվի: Ես համոզված եմ դրանում: Վարչապետ Նիկոլ Փաշինյանը բոլոր խնդիրները կհարթի, բոլորին իրենց տեղը կդնի իրենց չափով: Սասուն Միքայելյանի նեղվածությունը բնական է: Նա իրավունք ուներ նեղվելու: Ճիշտ էր արել, որ նեղվել էր:
– Ինչո՞ւ, որ չընտրվե՞ց ՔՊ վարչության անդամ:
– Ոչ թե վարչության անդամ, այլ այնքանով, որ իրենց ապրածով, ճիշտ քայլած որոշ մարդիկ բերեցին ու Աբովյանի ընտրությունները կապեցին Սասուն Միքայելյանի հետ: Բոլորիս էլ պարզ էր, որ Վահագն է ընտրվելու: Վահագնի հետ 15 տարուց ավելի աշխատել ենք, նա կարգին անձնավորություն է, իր ֆակտորը մեծ դերակատարություն ուներ: Իրենք փոխարենը էդ մարդուն իրենց կողմը բերելով հզորանային, բռնեցին ու նոր թեկնածու առաջադրեցին, որին ոչ մեկը չէր ճանաչում: Իսկ Վահագնը ժողովրդի ընտրյալն է, ժողովրդի կողմից սիրված անձնավորություն: Իսկ որոշները բռնեցին ու պատահական ինչ-որ մարդու առաջադրեցին ու քաղաքականացրեցին գործընթացը: Ես էլ, չնայած «Քաղաքացիական պայմանագրին» պաշտպանում եմ, բայց իմ ամբողջ ազգուտակը այնտեղ է, մենք Արամուսից ենք, Աբովյանից ենք, և ես հազարավոր մարդկանց ասել եմ, որ գնան ու ձայն տան Վահագնին: Ոչ թե Սասուն Միքայելյանն է ասել, այլ ես եմ ասել մարդկանց, որ գնան այդ ձևով անեն:
– Դուք ասել եք, որ մարդիկ գնան ու ընտրեն Վահագն Գրիգորյանի՞ն:
– Անպայման: Ես երկար տարիներ այդ տղային ճանաչել եմ: Բացի այդ, ես իմ հարազատներին հարցրել եմ, թե ոնց ա պահում իրեն այդ քաղաքապետը, բոլորն էլ գոհ են եղել: Ես էլ ասել եմ՝ գնացեք նորից ընտրեք: Իրենք (նկատի ունի իշխանությունը – Ս. Հ.) Վահագնին պետք է իրենց մոտ տանեին, այլ ոչ թե նրան հեռացնեին իրա ընտրողների հետ, արհեստական լարվածություն ստեղծեին ու իրենց անհաջողության համար էլ մեղադրեին Սասուն Միքայելյանին, թե նա չի օգնել:
– Պարոն Հակոբյան, փաստորեն Աբովյանի քաղաքապետի ընտրություններին Դուք սատարել եք հակառակորդ թեկնածուին:
– Ես ասել եմ՝ որը ճիշտ ա, դա արեք: Մարդիկ էլ տեսել եմ, որ Վահագն Գրիգորյանը, ով 15 տարի եղել է մեզ հետ, մեր կողքին, պարյադչնի մարդ է: Նա ոչ թե ԲՀԿ-ից է եղել, ՀՀԿ-ից է եղել, այլ նա որպես անհատ է եղել:
– Բայց նախորդ ընտրություններին ԲՀԿ-ն բացահայտ, իսկ այս ընտրություններին ոչ բացահայտ, բայց սատարում էր Վահագն Գևորգյանին: Ընտրության օրը ամբողջ ԲՀԿ խմբակցությունը Աբովյանում էր: Ստացվում է, որ Դուք ԲՀԿ թեկնածուին եք սատարել:
– Ես ԲՀԿ թեկնածուին չեմ պաշտպանել, ես պաշտպանել եմ Վահագն Գևորգյանին, որը որպես մարդ, որպես հայ, որպես ժողովրդի թեկնածու՝ կարգին անձնավորություն է: Ես վստահ եմ, որ վաղը-մյուս օրը վարչապետը չի փոշմանելու, որ Աբովյանի քաղաքապետը Վահագն Գրիգորյանն է: Նա իր գործով կապացուցի, որ կարող է դառնալ հանրապետության թիվ մեկ քաղաքապետը:
– Իսկ Կոտայքի մարզպետն ասում էր, որ Վահագն Գրիգորյանը քրեաօլիգարխիայի ներկայացուցիչ է, և նրա պարտությամբ հենց պետք է վերջ դրվեր այդ համակարգին:
– Կոտայքի մարզպետը ուրիշ ինչ պետք է աներ, ասեր: Կոտայքի մարզպետը, Կոտայքի մարզպետը… ուրիշ մարդ չկա՞:
– Ուզում եք ասել, որ Աբովյանի ընտրություններից հետո հիմք դրվեց ՔՊ-ի ներսի հակասություններին ու լարվածությա՞նը:
– Ոչ: Դրանից առաջ չմոռանանք, թե Ապարանում ինչ տեղի ունեցավ: Աղվան Հովսեփյանի, Սամվել Ալեքսանյանի հետ ՔՊ-ից փոխվարչապետն էր պարում: Աբովյանում էլ նույնը տեղի ունեցավ: Եթե ժողովուրդը չտեսներ այն, ինչ տեսավ, կարող է ՔՊ-ի թեկնածուն կրեր, բայց իրենց արածներից հետո 10-15 տոկոսով իրենց ռեյտինգը ընկավ: Ես էլ դրանից հետո տրամադրվեցի: Հանրապետականների հետ տաշի-տուշի են անում, Վահագնի պես տղուն էլ չե՞ն ուզում պաշտպանել: Սա է: Վահագնը հազար անգամ ավելի լավ թեկնածու է, քաղաքապետ է, քան այն մարդիկ, ովքեր Ապարանում Աղվան Հովսեփյանի հետ պարում էին, աղուհաց էին կիսում, իսկ նույն ակտիվից ոչ մեկը ներկա չէր: Բալորս էլ գիտենք՝ Մյասնիկ Մալխասյանն ինչ վիճակում է, բայց նրա տղան այնտեղ չէր, ոչ ոք նրան տեղյակ չէր պահել: Բայց ամբողջ տոնը Աղվան Հովսեփյանի շուրջն էր կառուցված: Ինչի՞, Աբովյանում իրենք լիդերներ, ակտիվ չունեի՞ն, որ մնացել էին Աղվան Հովսեփյանի ու Սամոյի հույսին: Բնական է. որ սա պետք է ստացվեր: Հենց սենց բաներից է ժողովուրդը հիասթափվում ու սկսում հակառակն անել կանխամտածված: Բայց սենց բաներն էլ են ճիշտ, որ մենք մեր սխալները ուղղենք:
– Դուք համարում եք, որ սխալվե՞լ եք ներկա իշխանությանը հավատալով: Մեր վերջին զրույցում Դուք անվերապահ վստահություն էիք հայտնում Նիկոլ Փաշինյանին:
– Ես շատ ճիշտ եմ ասել, հիմա էլ եմ այդ կարծիքին, բայց բաներ կան, որ իրենք էլ պետք է հասկանան, նույն Ռոմանոսը պետք է հասկանար, որ երկար տարիներ անհատ եղած տղային իրենց կողմը բերելու վրա պետք է աշխատեր, ոչ թե եսիմում բերեր դներ: Վահագնը իրենով է հասել այդ ամենին: Գագիկ Ծառուկյանը բարձրանար երկինք, իջներ ներքև, եթե Վահագնը կարգին տղա չլիներ, Ռոմանոսի թեկնածուն կկրեր, բայց Վահագնը կարգին աշխատող տղա է, դրա համար էլ ժողովուրդը նրան ընտրեց: Ես համոզված եմ, որ եթե Գագիկ Ծառուկյանը դեմ էլ գնար Վահագնին, պաշտպաներ Ռոմանոսի թեկնածուին, մեկ է՝ Վահագնը ավելի մեծ ձայների տարբերությամբ կկրեր:
– Պարոն Հակոբյան, ես ճի՞շտ հասկացա, որ ձեզ մոտ իշխանության նկատմամբ հիասթափություն է առաջացել:
– Մի-երկու դեպքերից՝ այո: Նույն Ապարանի դեպքը, Աբովյանի դեպքը: Ես ինչ ասեմ նրանց: Պարզ է, չէ՞, որ նման բաները հիասթափեցնող են, երբ իշխանությունը գնում կանգնում է ոչ թե իր ակտիվի կողքը, ոչ թե կռված տղաների կողքը, այլ Աղվանի ու Սամոյի հետ են բաժակ խփում: Իրենք իրենց պետք է հաշիվ տան: Եթե իրենք մի տեղ են գնում, ապա իրենց ակտիվը պետք է իրենց կողքը լինի, որ նրանց հզորացնեն: Ես արդեն բերեցի Մյասնիկ Մալխասյանի տղայի օրինակը: Բայց իրենք ոնց որ թե ինադու՝ մարդկանց հիասթափեցնելու համար քայլեր են անում:
– Պարոն Հակոբյան, նախօրեին Մանվել Գրիգորյանի որդու՝ Կարեն Գրիգորյանի նկատմամբ քրեական գործ է հարուցվել: Կարեն Գրիգորյանը Ձեր փեսան է, ինչպե՞ս եք վերաբերվում, մեկնաբանում կատարվածը:
– Ախր ինչ քրեական գործ: Որ ասեին՝ կաշառք է վերցրել և այլն, էլի ուրիշ բան, բայց նա ընդամենը ԵԿՄ-ի երկու հաշմանդամ մարդու ձևակերպել է որպես աշխատող: Կաշառք չեն վերցրել, այլ օգնել են մարդուն: Ճիշտ ա, պետք ա չաներ նման բան, բայց էդ ժամանակ դա նորմալ, բարի գործ է եղել: Մարդը երկու հաշմանդամի է օգնել, նրանց ձևակերպել է որպես աշխատող: Եթե նրանց ձևակերպեր, գումարը դներ իրա գրպանը՝ ուրիշ բան, բայց մարդը օգնել է էդ տղաներին: Ես իրեն չեմ հարցրել էդ թեմայից, բայց գիտեմ՝ ինչը ոնց է եղել:
– Այդ դեպքում այդ հիմքով քրգործ հարուցելը ինչպե՞ս եք գնահատում:
– Եթե այդպես վերցնենք, ուրեմն Հայաստանի կեսին պետք է դատենք: Երկրի հերն անիծածները ազատության մեջ են, չեն դատվել, երկու մարդու օգնելու համար նրանց ձևակերպել է աշխատանքի՝ դատում ենք: Ինչ ասեմ: Թող շարունակեն այդպես: Բան չունեմ ասելու:
