Տրանսֆերային պատուհանի բացվելուն պես Լոնդոնի «Արսենալում» լարված իրավիճակ է ստեղծվել: Այս մասին գրում են բրիտանական լրատվամիջոցները՝ նշելով, որ լոնդոնյան ակումբը կանգնած է հերթական անկման եզրին:
Խոսքը մասնավորապես վերաբերում է «Արսենալի» կազմին, որը, ըստ կանխատեսումների, գալիք մրցաշրջանում կարող է շատ ավելի թույլ լինել: Ավարտված մրցաշրջանում Էմերիի թիմը ակտիվ պայքար էր մղում երկու մրցաշարերում՝ Պրեմիեր լիգայում և Եվրոպա լիգայի խաղարկությունում: Թիմի առաջ խնդիր էր դրված գալիք մրցաշրջանում հանդես գալ Չեմպիոնների լիգայի խաղարկությունում: «Արսենալը» չհասավ նպատակին, ինչը բնականաբար հիասթափություն առաջացրեց թե՛ երկրպագուների և թե՛ ակումբի սեփականատերերի շարքերում:
Ըստ Express պարբերականի՝ «Արսենալի» ղեկավարությունը ընդամենը 45 միլիոն ֆունտ է հատկացրել գլխավոր մարզիչ Ունայ Էմերիին նոր ֆուտբոլիստներ ձեռք բերելու համար: Բնական է, որ այս գումարով հնարավոր չէ լուրջ քայլեր կատարել և ուժեղացնել կազմը: Նշվում է, որ ակումբի սեփականատերերը վերջին հնարավորությունն են տվել Էմերիին: Թիմի առաջ կրկին խնդիր է դրվել Չեմպիոնների լիգայի խաղարկության ուղեգիր նվաճելու:
Վերջին տարիներին «Արսենալը» չի մասնակցել եվրոպական ակումբային ամենահեղինակավոր մրցաշարին, ինչը զայրույթի ալիք է բարձրացրել: Թիմի կազմը ուժեղացնելու նպատակով Էմերին ցանկանում է ձեռք բերել 5-6 ֆուտբոլիստների, բայց բավարար միջոցներ առայժմ չկան: Իսպանացի մասնագետը մտադիր է վաճառել ֆուտբոլի Հայաստանի ազգային հավաքականի ավագ Հենրիխ Մխիթարյանին և Մեսութ Օզիլին: Նույն աղբյուրի համաձայն՝ այս պահին Օզիլի և Մխիթարյանի նկատմամբ այլ ակումբների կողմից հետաքրքրություն չկա: Էմերին փորձում է ակումբներ գտնել նշված ֆուտբոլիստների համար, բայց…
Մխիթարյանի պայմանագիրը «Արսենալի» հետ նախատեսված է մինչև 2021թ. ամառը: 2018/2019 թթ. մրցաշրջանում Մխիթարյանն «Արսենալի» կազմում անցկացրել է 25 հանդիպում՝ դառնալով 6 գոլի և 4 գոլային փոխանցման հեղինակ: Վերջին շրջանում Մխիթարյանի տրանսֆերային արժեքը զգալի անկում է ապրել և հիմա կազմում է մոտ 25 միլիոն ֆունտ: Ավելի վաղ մամուլում տեղեկություններ կային, որ հայ կիսապաշտպանի ծառայություններով հետաքրքրված են իտալական ակումբներ, մասնավորապես՝ «Միլանը»: Նախօրեին Հայաստանի ազգային հավաքականի ավագը լուսանկար էր հրապարակել «Արսենալի» նոր մարզաշապիկով, ինչը ստիպում է ենթադրել, որ Մխիթարյանը մտադիր չէ հեռանալ Լոնդոնից:
«Արսենալի» ֆուտբոլիստներից այլ ակումբների ուշադրության կենտրոնում են մասնավորապես հենակետային կիսապաշտպան Լուկաս Տորեյրան և հարձակվող Պյեր Էմերիկ Օբամեյանգը: Վերջինս շահավետ առաջարկ է ստացել Չինաստանից, իսկ Տորեյրայի ծառայություններով հետաքրքրված է նույն «Միլանը»: Բրիտանական լրատվամիջոցները նշում են, սակայն, որ Էմերին չի ցանկանում բաց թողնել այս ֆուտբոլիստներին և ամեն ինչ անում է, որ տեղափոխության շուրջ բանակցություններ չսկսվեն: Տորեյրային և Օբամեյանգին Էմերին համարում է առանցքային ֆիգուրներ և մեծ հույսեր է կապում նրանց հետ գալիք մրցաշրջանում: Տրանսֆերային պատուհանի ընթացքում «Արսենալը» կարող է ծանր հարված ստանալ, եթե թիմից հեռանան պաշտպանական օղակի խաղացողներ Լորան Կոսելնին, Շկոդրան Մուստաֆին, ինչպես նաև Նաչո Մոնրեալը:
Express պարբերականի համաձայն՝ «Արսենալի» ղեկավարությանը չի հաջողվել պայմանագիրը երկարաձգելու շուրջ համաձայնության գալ Կոսելնիի հետ, և նա հեռանալու է: Կոսելնին հնարավոր է պայմանագիր կնքի ֆրանսիական «Ռենի» հետ: «Արսենալը» Կոսելնիի տրանսֆերի համար «Ռենից» պահանջում է 10 միլիոն ֆունտ: Մոնրեալի պայմանագրի ժամկետն «Արսենալի» հետ արդեն իսկ ավարտվել է, և իսպանացի պաշտպանը մտադիր է տեղափոխվել «Բարսելոնա»: Ինչ վերաբերում է Մուստաֆիին, ապա այս ֆուտբոլիստը ևս չի ցանկանում կարիերան շարունակել «Արսենալում», իսկ Էմերին չի ցանկանում կանգնեցնել նրան: Որոշ տեղեկությունների համաձայն՝ Մուստաֆին առաջարկ է ստացել թուրքական «Ֆեներբախչեից», և հնարավոր է մոտ ժամանակներս գործարքը կայանա: Հիշեցնենք, որ Մուստաֆին «Արսենալ» էր տեղափոխվել 2016 թվականին՝ «Վալենսիայից»: Այս պաշտպանի տրանսֆերի համար լոնդոնյան ակումբը վճարել էր 35 միլիոն ֆունտ:
Պաշտպանական գիծն ամրացնելու համար Էմերին ցանկանում է ձեռք բերել ֆրանսիական «Սենտ Էտյենի» պաշտպան Ուիլիամ Սալիբին և շոտլանդական «Սելթիկի» ներկայացուցիչ Կիրան Տիրնիին: Վերջինիս տրանսֆերի համար «Սելթիկը» պահանջում է 25 միլիոն ֆունտ, մինչդեռ Էմերին պատրաստ է վճարել միայն 15 միլիոն ֆունտ:
Վերջին օրերին մամուլում շարունակվում են պնդումներն այն մասին, որ «Արսենալը» մտադիր է ձեռք բերել «Կրիստալ Փելեսի» 26-ամյա կիսապաշտպան Ուիլֆրիդ Զահային: Կոտդիվուարցի կիսապաշտպանի տրանսֆերային արժեքը գնահատվում է 55 մլն ֆունտ, սակայն «Արսենալը» այս պահին այդքան միջոցներ չունի ֆուտբոլիստին ձեռք բերելու համար: Զահան պահանջում է նաև շաբաթական 130.000 եվրո աշխատավարձ:
