«Գազպրոմ» ընկերությունը Չինաստան գազի մատակարարման համար չինական կողմից պահանջել է ոչ թե 25 միլիարդ դոլար, ինչպես նախկինում էր նշվել, այլ 40 միլիարդ դոլար հավելավճար,- հաղորդում է Vedomosti թերթը: Այս մասին թերթն իմացել է «Գազպրոմին» մոտ կանգնած իր աղբյուրներից:
«Գազպրոմ»-ը ցանկանում է այդ գումարը ստանալ 2012-2015 թթ., իսկ դրա մարումը կիրականացվի առաջիկա 30 տարիների ընթացքում գազի մատակարարման շնորհիվ: Մենք տեղեկացրել էինք, որ Չինաստանի և Ռուսատսանի միջև որոշակի խնդիրներ էին առաջացել այն բանից հետո, երբ կողմերը չէին կարողացել համաձայնության գալ գազամուղի կառուցման ուղիների և գազի սակագների վերաբերյալ:
Ռուսաստանը մտահոգություն ունի, որ կարող է հսկայական գումարներ ծախսել գազամուղի կառուցման վրա, սակայն այն չի փոխհատուցվի, եթե Չինաստանը ռուսական գազի համար պահանջի ավելի ցածր սակագներ: Պահանջելով 40 մլրդ դոլար՝ Ռուսաստանն ապահովագրում է իրեն այդ վտանգներից: