Երևան քաղաքի առաջին ատյանի ընդհանուր իրավասության դատարանի դատավոր Արմենուհի Բադիրյանի վարույթում գտնվող` Տիգրան Բարսեղյանն ընդդեմ Դավիթ Ջալալյանի գործով կայացավ նախնական դատական նիստը։
Սույն գործով ֆուտբոլի Հայաստանի ազգային հավաքականի ֆուտբոլիստ Տիգրան Բարսեղյանը հայց էր ներկայացրել Դատարան` ընդդեմ «Առաջին լրատվական»-ի մարզական մեկնաբան Դավիթ Ջալալյանի: Բարսեղյանը Դատարանից խնդրել էր Ջալալյանին պարտավորեցնել հերքել զրպարտություն համարվող տեղեկությունները և ներողություն խնդրել «Առաջին լրատվական»-ում օգոստոսի 31-ին հրապարակված «Վտանգավոր անուններ՝ Վարդան Մինասյանի ցուցակում. Շտապ օգնության մի քանի տարբերակ…» վերտառությամբ հոդվածում առկա իր մասով արված մեկնաբանությունների համար:
Նախնական դատական նիստի ընթացքում տեղեկացանք, որ գործով ներգրավվել են ևս երկու փաստաբան, որոնցից նիստին ներկայացածը միջնորդեց հետաձգել նիստը, քանի որ հնարավորություն չի ունեցել ծանոթանալ գործի նյութերին։
«Նշեմ, որ լիազորագիրը տրված էր սույն թվականի հունիս ամսվա սկզբով, ինչը փաստում է, որ ներկայացուցիչները ունեցել են հնարավորություն իրականացնելու իրենց դատավարական իրավունքները։
Իսկ վկայակոչված հանգամանքը, թե լիազորագիրը մնացել էր նախկին ներկայացուցչի մեքենայի մեջ և միայն երեկ երեկոյան է հնարավոր եղել վերցնել, ինձ համար արժանահավատ չէ և անընդունելի է, ինչի մասին իմ կողմից բարձրաձայնվեց։ Այնուամենայնիվ նիստը հետաձգվեց մինչև հոկտեմբերի 24-ը , և հնարավորություն չունեցա ներկայացնել գործով հայցային վաղեմություն կիրառելու մասին միջնորդությունը։
Այս դեպքը ևս մեկ անգամ փաստում է դատական համակարգում տիրող իրավիճակի մասին` ծանրաբեռնվածության լույսի ներքո, ինչպես նաև փաստաբանական ինձ համար ոչ այնքան ընդունելի մարտավարական հնարքների մասին։ Ինչպես ասում են` երեքը մեկի դեմ։ Ես պատրաստ եմ»,- «Առաջին լրատվական»-ի հետ զրույցում ասաց Ջալալյանի շահերը ներկայացնող Ծովինար Կարապետյանը։