Իսրայելում արդեն մի քանի օր է, ինչ շարունակվում են եթովպիական համայնքի խոշոր բողոքի ցույցերն այն բանից հետո, երբ ոստիկանության աշխատակցի կողմից սպանվել է 19-ամյա Սողոմոն Թեքան։
Ցուցարարները փակել են մայրուղիներն ու արգելափակել են Թել Ավիվ, Նեթանիու, Ռիշոն լե Ցիոն և Աշքելոն խոշոր քաղաքների մուտքերը։ Խցանման մեջ են մնացել հարյուր հազարավոր իսրայելցիներ։ Ցուցարարների հետ բախումների արդյունքում վիրավորվել է ոստիկանության աշխատակից։
Ավելի վաղ ոստիկանության աշխատակցի կողմից սպանվել է Քիրիաթ Խաիմի 19-ամյա բնակիչը, ում դեմ նախկինում մի քանի գործ է հարուցված եղել օրինախախտության համար։ Դեպքը տեղի է ունեցել հունիսի 30-ին երիտասարդական ակումբի շրջակայքում, որտեղ անց են կացվում Եթովպիայի հայրենադարձ ընտանիքների երեխաների համար կազմակերպված միջոցառումներ։
Ոստիկանության հայտարարության համաձայն՝ իրենց աշխատակիցն ինքնապաշտպանություն է կիրառել։ Ներկա պահին ոստիկանը ազատ է արձակվել տնային կալանքի պայմանով, իսկ սպանվածի հարազատներն ու ընկերները խիստ պատիժ են պահանջում։