Վարչապետ Նիկոլ Փաշինյանը հեռախոսազրույց է ունեցել Բելառուսի նախագահ Լուկաշենկոյի հետ, որի ընթացքում քննարկվել են թե՛ երկկողմ հարցեր, թե՛ Եվրասիական ինտեգրացիոն միավորումներին առնչվող խնդիրներ: Վարչապետի հեռախոսազրույցի հանգամանքը ուշագրավ է հունիսի 30-ին Բելառուսում տեղի ունեցած Եվրոպական խաղերի փակման արարողության ֆոնին, որին մասնակցել է Հայաստանի նախագահ Արմեն Սարգսյանը: Այդ հանգամանքն առավել ակնառու է դառնում Նիկոլ Փաշինյանի հետ հեռախոսազրույցի մասին Լուկաշենկոյի հայտարարության ֆոնին, որ տարածվել է մամուլում: Բելառուսի նախագահն ասել է, որ Նիկոլ Փաշինյանը խնդրել է բարևներ փոխանցել Արմեն Սարգսյանին, որը շարունակում է գտնվել Բելառուսում: Կատա՞կ է եղել Փաշինյանի այդ բարևը, թե՞ որոշակի ակնարկ, իհարկե դժվար է ասել, սակայն հատկանշական է, որ Լուկաշենկոն դաշտ է նետում այդ գործոնն իրեն բնորոշ խորամանկությամբ: Իսկ հանգամանքը ուշագրավ է այն տեղեկատվության ֆոնին՝ լուսանկարների և տեսանյութի, որ տարածել է Հայաստանի նախագահի նստավայրը՝ Արմեն Սարգսյանի՝ Մինսկում Եվրոպական խաղերի փակման արարողությանը մասնակցությունից:
Դրանցում ակնհայտ է, որ շեշտադրված է Պուտինի հետ նրա մտերմիկ շփումը: Ընդ որում հատկանշական է, որ շփումը բավականին անհարմարություն է պատճառում Լուկաշենկոյին, որը պարբերաբար փորձում է նայել Սարգսյանի և Պուտինի կողմ, թերևս նեղսրտած, որ Պուտինն իր հետ չի շփվում այդքան: Թե որն է եղել Սարգսյան-Պուտին զրույցի թեման, ինչից են խոսել երկու նախագահները, պարզ չէ, սակայն Լուկաշենկոյի «բարձրաձայնումը», թե Նիկոլ Փաշինյանն Արմեն Սարգսյանին բարև է փոխանցել, «մատնում» է Բելառուսի նախագահի սրտայրուքը: Նա ասել է, թե Նիկոլ Փաշինյանին հայտնել է, որ հույս չունենա Արմեն Սարգսյանի արագ հետ վերադարձի առումով: Լուկաշենկոն, ըստ երևույթին, Սարգսյանին ուզում է պահել այնքան, մինչև կկորզի Պուտինի հետ ամբողջ խոսակցությունը: Դա, իհարկե, կատակ է, սակայն հատկանշական է նաև, որ Հայաստանի վարչապետն էլ Լուկաշենկոյի միջոցով է Սարգսյանին բարև փոխանցում, երբ կարող էր դա անել անմիջապես կապվելով նրա հետ: Արդյո՞ք Հայաստանի վարչապետին էլ հետաքրքրել է Սարգսյանի շփումը Պուտինի հետ, առավել ևս՝ նկատի ունենալով անցնող օրերին ՌԴ դեսպանի հայաստանյան ակտիվությունը:
Ըստ երևույթին, Փաշինյանն էլ այդպիսով ակնարկում է Արմեն Սարգսյանին, որ կարիք կա «կիսվել» զրույցի մանրամասներով: Արմեն Սարգսյանն ինքը մի քանի անգամ հայտարարել է, որ արտաքին քաղաքականության ուղղությամբ իր գործողությունները, այցերը, հանդիպումները լիովին համաձայնեցված են վարչապետի հետ, ինչպես պահանջում է Սահմանադրությունը: Մյուս կողմից, հասկանալի է, որ, այսպես ասած, դետալային համաձայնության մասին խոսք լինել չի կարող և, ըստ երևույթին, Պուտինի հետ շփումների և զրույցի առումով առկա է նախագահ-վարչապետ խորհրդակցության անհրաժեշտություն: Համենայնդեպս, աներկբա է մի բան: Հայաստանի նախկին իշխող համակարգն ինտենսիվ աշխատում է նախագահ-վարչապետ կոնֆլիկտ և դիմակայություն հրահրելու ուղղությամբ, հասկանալով նրանց համադրված աշխատանքի ուժը նոր իրավիճակը ամրացնելու առումով: Պետք չէ թույլ տալ, որ նախկին իշխանության խմբերից զատ, նաև արտաքին որևէ սուբյեկտ, այդ թվում՝ ՌԴ իշխանությունը կարծի, որ կարող է թեկուզ նրբորեն աշխատել նախագահին վարչապետի դեմ դուրս բերելու, կամ հակառակ ուղղությամբ: