Մերձավոր Արևելքում իրավիճակը շարունակում է լարված մնալ. Իսրայելը հրթիռակոծել է Սիրիայի մայրաքաղաք Դամասկոսը և Հոմսը, վերջին տվյալների համաձայն՝ զոհվել է ավելի քան 15 մարդ, կան տասնյակ վիրավորներ: Թեմայի շուրջ «Առաջին լրատվական»-ը զրուցել է ԵՊՀ Արևելագիտության ֆակուլտետի Արաբագիտության ամբիոնի վարիչ Հայկ Քոչարյանի և ԵՊՀ Հայագիտական հետազոտությունների ինստիտուտի գիտաշխատող Սարգիս Գրիգորյանի հետ:
«Կոնտեքստը չի փոխվել վերջին առնվազն հինգ տարվա ընթացքում, Իսրայելն ունի իր համար մատնանշած ազգային անվտանգության անվտանգային միջավայրի պահպանման սահմանագծեր, որոնց մեջ մտնում է իր սահմաններին մոտ գտնվող Իրանի հետ ասոցացվող ցանկացած ուժի խոչընդոտում»,- ասաց Հայկ Քոչարյանը՝ հավելելով, որ ռմբակոծության են ենթարկվել Դամասկոսի արվարձանում տեղակայված Իրանի հետ ասոցացվող ուժերը:
Մեր զրուցակիցը անդրադարձավ նաև Իսրայելում տեղի ունեցած Ռուսաստանի, ԱՄՆ-ի և Իսրայելի Անվտանգության խորհրդի քարտուղարների հանդիպմանը: «Այսինքն՝ փաստացի պահպանվել են այն համաձայնությունները, որոնցով Ռուսաստանը չի միջամտում Իսրայելի անվտանգությանը խոչընդոտող հարցերին… եթե ռուսական կողմը միջամտեր գործընթացին, ապա ականատեսը կլինեինք հակաօդային համակարգերի ավելի էֆեկտիվ աշխատանքի»:
Գրիգորյանը նշեց, որ Իսրայելը կոնկրետ ուղենշած ռազմավարություն ունի, մասնավորապես Սիրիայում վերջին դեպքերը ցույց են տալիս, որ թիրախներն ակնհայտ են՝ պրոիրանական խմբավորումները, դրանց կայանատեղիները, որոնք գործում են առանձին ռազմաբազաներում, որոշ տվյալների համաձայն՝ թիրախում եղել են նաև որոշ գիտահետազոտական կենտրոններ:
Հարցին՝ Մերձավոր Արևելքում տեղի ունեցող զարգացումները ի՞նչ ազդեցություն են ունենալու Հայաստանի վրա, և ի՞նչ անելիքներ կան կարճաժամկետ և երկարաժամկետ հեռանկարում, Քոչարյանը պատասխանեց. «Հայաստանը պետք է մշակի ՀՀ անվտանգության հայեցակարգ, որտեղ պետք է տեղ գտնի Մերձավոր Արևելքի հետ կապված կոմպոնենտը, ինչ-որ բաներ արվում են, ինչ-որ բաներ քննարկվում են, բայց ամբողջական ինֆորմացիային չեմ տիրապետում, քանի որ հրապարակումներ չկան:
Բայց պետք է մշակել մերձավորարևելյան քաղաքականության հայեցակարգ, որի մասին բազմիցս խոսվել է, պոտենցիալը կա, գիտելիքը, ժառանգությունը՝ ևս: Պետք է հստակ սցենարներ ունենալ՝ կապված տարբեր ճանապարհների փակման և բացման հետ: Վրաստանի հետ կապված անմիջապես Անվտանգության խորհրդի նիստ հրավիրվեց, քանի որ վտանգը ակնհայտ և շոշափելի էր, բայց սրանք էլ պակաս կարևորության հարցեր չեն»:
Գրիգորյանի խոսքով՝ անհրաժեշտ է նաև Սփյուռքի ներգրավում, հատկապես Մերձավոր Արևելքի համայնքների, քանի որ տեղում ունենք ազդեցիկ գործոն՝ մեր համայնքը: «Մերձավոր Արևելքը մի թնջուկ է, որտեղ պրոցեսները ալիքի տեսքով հարվածում են հարակից տարածաշրջաններին, և այդ ալիքն անընդհատ զգացել ենք: Սա պետք է լինի ազդակ մեր պատկան մարմիններին, իշխանություններին, որ առանձին բլոկով լինի մերձավորարևելյան քաղաքականության հատվածը: Պետք է զգոն լինենք, ուշիուշով հետևենք իրադարձություններին»:
Առավել մանրամասն՝ տեսանյութում:
