Օրերս արդարադատության նախարարությունը կառավարություն է ուղարկել «օրենքով գողերի» վերաբերյալ աղմկահարույց նախագիծը․ քրեական միջավայր ստեղծելը, քրեական միջավայրում ներգրավվելն ու ենթամշակույթին հարելը, ըստ այդմ, համարվում են քրեորեն պատժելի արարքներ։ Օրենքը տարբեր պատժամիջոցներ է սահմանում քրեական տարրերի համար՝ 6-ից մինչև 15 տարի ազատազրկում։
Օրինագիծն արդարադատության նախկին նախարար Արտակ Զեյնալյանի նախաձեռնությունն էր, և այն արդեն մեկ անգամ ուղարկվել է կառավարություն, որից հետո այն ուղարկվել է լրամշակման։ Ըստ նախագծի՝ քրեական ենթամշակույթը լուրջ մարտահրավեր է մեր հասարակության համար, քանի որ սպառնում է խաթարել, աղավաղել մեր հասարակության պատկերացումները և արժեքները։ Որքանո՞վ է այսօր Հայաստանի համար կենսական անհրաժեշտություն նման օրինագիծը «Առաջին լրատվական»-ի հարցին ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող դիտորդների խմբի ղեկավար Հասմիկ Հարությունյանը պատասխանեց․ «Այս պահին այն շահագրգիռ կողմերին, որոնք հետաքրքրված են եղել այս օրինագծով, փորձել են մասնակցություն, լայն հնարավորություն ունենալ օրինագծի քննարկմանը, դեռևս հնարավորություն չի ընձեռվել։ Այսինքն՝ այս պահին մի իրավիճակ է, որ օրինագիծը կառավարություն մտնելու փուլը կա, սակայն քննարկումներ, կարծիքներ ներկայացնելու հնարավորություն չի եղել։ Ես հիշեցի մարտ ամսի այն կարճ ժամանակահատվածը, երբ օրինագիծը հրապարակային դարձավ, ապա այն դուրս եկավ e-draft-ից, և այսօր էլ ես փորձեցի տեսնել՝ հասանելիություն կա, թե ոչ, e-draft-ում օրինագիծը դեռևս չկա»։
Իսկ Մարդու իրավունքների պաշտպանի աշխատակազմի խոշտանգումների կանխարգելման վարչության պետ Գոհար Սիմոնյանն ասաց․ «Ինչ վերաբերում է ընդհանրապես քրեական ենթամշակույթի դեմ պայքարին, դա իրականում խնդիր է։ Հատկապես այն լուրջ խնդիր է քրեակատարողական համակարգում, որն իր բազմապիսի բացասական հետևանքներն է ունենում քրեակատարողական համակարգի և դրա զարգացման վրա։ Դա է պատճառը, որ Մարդու իրավունքների պաշտպանը 2018 թվականի դեկտեմբերին հրապարակեց արտահերթ զեկույց, որն իրենից ներկայացնում էր քրեակատարողական համակարգում քրեական ենթամշակույթի դեմ պայքարի հայեցակարգ։ Հայեցակարգը պետք է վեր հաներ բոլոր այն գործոնները, որոնք նպաստում են քրեակատարողական ենթամշակույթի տարածմանը»։
Մանրամասները՝ տեսանյութում։