Այս տարի Գաբրիել Սունդուկյանի անվան Ազգային ակադեմիական թատրոնին կից ստեղծվեց նոր, յուրօրինակ «Սև տուփ, փոքր բեմ» թատրոնը: Սա թատերական իրադարձություն է: «Սև տուփ» թատերական կառույցի գաղափարը ծնվել է 20-րդ դարասկզբին Եվրոպայում, այն կոչված էր կոտրելու թատրոնի կարծրատիպերը:
Որքանո՞վ նորարական մոտեցումներն արդիական կլինեն Հայաստանում. թեմայի շուրջ «Առաջին լրատվական»-ի հետ զրույցում ֆրանսահայ ռեժիսոր Սերժ Մելիք-Հովսեփյանը նշեց, որ Հայաստանում առաջին անգամ է ստեղծվում այսպիսի տարածք, որը նպատակ ունի դառնալ փորձարարական թատրոն՝ չկրկնելով թատրոնի հին ավանդույթները և հնարավորություն ընձեռելով երիտասարդներին:
Սերժ Մելիք-Հովսեփյանը հրավիրվել է նոր ձևաչափով թատրոնում աշխատելու, նորակառույց թատրոնում նրա առաջին ներկայացումը Մաթիե Վիշնյակի «Ռիչարդ երրորդը տեղի չի ունենա» պիեսն է, որը կբեմադրվի հունիսին: «Այս պիեսը արվեստագետի և իշխանության հարաբերության մասին է, արվեստագետի ներքին տատանումների մասին է, այն մասին, թե ինչպես է այդ միջավայրում արվեստագետն իր տատանումները, վախերը արտացոլում բեմադրության մեջ: Այս պիեսում խոսվում է անցյալից , որի մասին Հայաստանում չի խոսվում. մենք ունեցել ենք զոհված արվեստագետներ, բայց մենք այդ մասին չենք խոսում»,- նշեց ռեժիսորը:
Ս. Մելիք-Հովսեփյանի դիտարկմամբ՝ արվեստագետը երբ որ սկսում է ինքն իրեն ցենզուրայի ենթարկել, անբարոյականության մեջ է ընկնում, թեև կարող է շատ բարոյական մարդ լինել: «Արվեստագետը հարմարվում է վախից, ոչ թե հանուն գումարի»,- ընդգծեց ռեժիսորը՝ հավելելով, որ եթե արվեստագետն ազատ չի ստեղծագործում, նրա ստեղծագործությունն իրականությունից կտրված է դառնում: Նրա դիտարկմամբ՝ հայաստանյան թատրոնը դեռ չի թոթափել անցյալը: «Թատրոնը սուպերմարկետ չէ, հանրությանը չի հրամցնում ցանկացած ապրանք, թատրոնը հանրությունից գոնե մեկ քայլ առաջ պետք է լինի… Պետք է դաստիարակել հանդիսատեսին՝ լավ իմաստով»:
Մանրամասն՝ տեսանյութում: