«Մեր մշակույթն ունի կրթական խնդիր. մշակութային դեգրադացիան, որ առկա է հատկապես կինոյի ոլորտում, բացառապես կրթության հետ կապված խնդիր է: Հանդիսատեսին պետք է կրթել փոքրուց, որ պահանջատեր լինի, մեծանա և որակով արտադրանք պահանջի,- «Առաջին լրատվական»-ի հետ զրույցում այս մասին ասաց ռեժիսոր Էդգար Բաղդասարյանը: -Մշակութային ստարատեգիա պետք է լինի, շուկայի վրա պետք է ազդեցություն գործես: Ես կարծում եմ, որ ինքնագիտակցաբար սահմանափակվելն է մարդուն մարդ սարքում, այլ ոչ թե ամենաթողությունը: Լծակներ պետք է ունենաս, որ պաշտպանվես այն ամենից, ինչը վնասում է, ինչպես որ միկրոբներից ես պշտպանվում և վիրուսներից. դեղ միշտ կա… Պետք է այնպիսի շուկա ձևավորես, որ ասի՝ հերի՛ք է, այս աղբով մեզ մի՛ կերակրեք: Ցավոք սրտի դեռ տգիտություն է… Եթե արգելվի արտադրել այն աղբը, որ կա մշակույթի տարբեր ոլորտներում, դա կբերի նրանց ծաղկմանը: Լռությամբ պետք է պատժես»:
«Չենք կարող խուսափել ծայրահեղություններից և պոպուլիստական դրսևորումներից… Նիկոլը նստած է մի աթոռի վրա, որի երեք ոտքերը չկան: Նրան ոտքեր է պետք տալ, որ նստի, երբ որ պինդ կնստի, կսկսենք պահանջել, հարցնել, վիճել… Այստեղ էլի մշակույթի խնդիր է՝ մեր քաղաքական տգիտությունը, երկխոսության մեջ մտել չկարողանալը, այդ ամենը մշակույթի խնդիր է: Խոսակցական շտամպները մտել են մեր ներքին աշխարհ, որևէ մեկին չի հետաքրքրում դիմացինի ներքին աշխարհը: Նույնը քաղաքական գործիչներին է բնորոշ՝ լսելու ընդունակություն՝ զրո, բանավիճելու կուլտուրա՝ զրո, խոսելու մշակույթ չունեն: Հինգ տարեկանից պետք է կրթել մարդուն: Պետք է կրթվենք, պիտի զտենք, սահմանափակել սովորենք ու գնանք առաջ: Մենք խայտառակ վիճակ ենք ունեցել, այնքան բան գիտեմ, որ չեմ կարողանա ասել, ասեմ՝ կարող է ատոմային ռումբ պայթի… Խայտառակ ժառանգություն ենք ունեցել, հնարավոր չէ մի տարվա մեջ ամեն ինչը շտկել, մաքրել»,- ընդգծեց ռեժիսորը:
Մանրամասն՝ տեսանյութում:
