Հունիսի 28-ին Ֆրանսիայում գրանցվել է երկրի օդերևութաբանական դիտարկումների ողջ պատմության ընթացքում օդի ամենաբարձր ջերմաստիճանի ռեկորդը:
Այդ մասին հայտնել է France Info-ն՝ հղում անելով տեղի օդերևութաբանական ծառայությանը: Նրա տվյալներով՝ օրվա ընթացքում Վոկլյուզի հարավային դեպարտամենտի Կարպենտրա կոմունայում օդը տաքացել է ըստ Ցելսիուսի մինչև 44,3 աստիճան:
Մինչ այդ օդի առավելագույն ջերմաստիճանը Ֆրանսիայում դիտարկումների ողջ պատմության ընթացքում համարվում էր ըստ Ցելսիուսի 44,1 աստիճան ցուցանիշը: Այն գրանցվել է 2003 թվականի օգոստոսի 12-ին Գարի նահանգում՝ Ֆրանսիայի հարավում:
Ավելի վաղ տեղեկացվել է, որ Բուշ-դյու-Ռոնի, Գարի, Էրոյի և Վոկլյուզի դեպարտամենտներում հունիսի 28-ին վտանգի ամենաբարձր մակարդակն է հայտարարվել տապի պատճառով: Այդ կապակցությամբ Ֆրանսիայի վարչապետ Էդուար Ֆիլիպը երկրի քաղաքացիներին «առավելագույն զգոնության» կոչ է արել: Նա նաև հայտնել է, որ հունիսի 28-ին բարձր ջերմաստիճանի պատճառով Ֆրանսիայում փակ կլինի 4 հազար դպրոց: