ՀՀ երկրորդ նախագահ Ռոբերտ Քոչարյանի փաստաբանական թիմը պատրաստվում է բողոքարկել Վերաքննիչ քրեական դատարանի կողմից երեկ հրապարակված դատական ակտերը։
Այդ մասին նույն օրը հայտարարեցին Քոչարյանի փաստաբանական թիմից։ Բողոքարկման հիմք էլ, ըստ Քոչարյանի փաստաբանական թիմի, հանդիսանալու է այն փաստը, որ ի սկզբանե խաթարված է եղել արդար դատաքննության սկզբունքը․փաստաբաններին չի թույլատրվել ելույթ ունենալ և ներկայացնել իրենց առարկությունները։
Նշենք, որ դատարանը՝ նախագահությամբ Արմեն Դանիելյանի, հունիսի 25-ին բավարարել էր դատախազի, տուժողի և վերջինիս ներկայացուցիչ Սեդա Սաֆարյանի վերաքննիչ բողոքները։
Դատարանի որոշմամբ վերացվել է Ռոբերտ Քոչարյանի նկատմամբ որպես խափանման միջոց ընտրված Արցախի նախկին ու ներկա նախագահների անձնական երաշխավորությունը, և որոշվել է որպես խափանման միջոց կիրառել կալանավորումը։
Բացի դրանից՝ դատարանը որոշել է Սահմանադրական դատարան դիմելու և գործի վարույթը կասեցնելու Երևան քաղաքի ընդհանուր իրավասության առաջին ատյանի դատարանի 20.05.2019 թ․ որոշումը բեկանել և տվյալ դատական գործը ուղարկել նույն դատարան՝ նոր քննության։
Իրավապաշտպան, փաստաբանական հանրությունը դժվարանում են կանխատեսել, թե դատական համակարգում առկա ճգնաժամային իրավիճակում ինչ կարելի է ակնկալել Վճռաբեկ դատարանից։ «Դատական համակարգում առկա ճգնաժամային իրավիճակի պատճառը կայանում է արդարադատության իրականացման համար անհրաժեշտ երաշխիքների բացակայությունը, որի մեջ ես ընդգրկում եմ ոչ միայն օրենսդրական կարգավորումները, այլև դատավարություն իրականացնողների նախկինում ունեցած փորձը, որն անհամատեղելի է արդարադատության իրականացման մոտեցումներին։ Նրանք տարիներ շարունակ ունեն ոչ բարենպաստ գործելու փորձ, գործել են գործադիր իշխանությունից կախված վիճակում։ Հետևաբար, նման պայմաններում կանխատեսում անելը, այն էլ այս պայմաններում, դժվար է, քանի որ ամեն մի դատավոր ինքն է ամբողջությամբ պատասխանատվություն կրում արդարադատության իրականացման տեսակետից՝ չունենալով քաղաքական իշխանության կողմից որևէ արտաքին հրահանգ։ Այս մասով իրենք դժվարություններ ունեն»,- «Առաջին լրատվական»-ի հետ զրույցում ասաց իրավապաշտպան Արթուր Սաքունցը՝ հավելելով, որ միևնույն ժամանակ վճռաբեկի մասով այդ անկանխատեսելիությունն ավելի դրական է, քան կանխատեսելիությունը, որը պայմանավորված կլիներ որևէ արտաքին միջամտությամբ։ «Այս մասով ես գտնում եմ, որ այս փուլում դատավորները փորձության են ենթարկվում, անցնում են վեթինգի յուրօրինակ փուլ, որով բացահայտվում է նրանց կարողությունները, նրանց գիտելիքները, կամքը, ունակությունը արդարադատություն իրականացնելու ուղղությամբ։ Սպասենք ու կտեսնենք, թե Վճռաբեկ դատարանի դատավորները ինչպես են իրենց դրսևորում»,- ընդգծեց իրավապաշտպանը՝ ավելացնելով, որ շատ կարևոր է, որ Ռոբերտ Քոչարյանի պաշտպանական խումբն իր դատավարական իրավունքները իրացնելու հնարավորություն ունի և շատ կարևոր է, որ այսպիսով հնարավոր է դառնում շրջանցել արտադատարանական որևէ գործողություն.
«Դատավորներին ներկայումս տրված է իրենց դեմքը փրկելու լիակատար հնարավորություն, տեսնենք, թե ինչպես այդ հնարավորությունից կօգտվեն վճռաբեկի դատավորները»։
Մեր դիտարկմանը, որ շատ հաճախ դատավորների այդ «դեմքը փրկելու օպերացիան» մեկնաբանվում է որպես նոր իշխանություններին հաճոյանալու փորձ, Սաքունցը պատասխանեց. «Որևէ մի դատավոր չի կարող մի փաստ բերել, որ իր նկատմամբ ճնշում է եղել նոր իշխանությունների ժամանակ, իսկ եթե ճնշում եղած լիներ, ապա բոլոր դատավորները միանշանակ կալանքի որոշում կկայացնեին Քոչարյանի մասով։ Դատական պրակտիկան է ցույց տալիս, որ քաղաքական իշխանության կողմից չկա որևէ հրահանգ՝ ուղղված դատավորներին»։
Իրավապաշտպան Ժաննա Ալեքսանյանը ևս «Առաջին լրատվական»-ի հետ զրույցում ասաց, որ դատական համակարգում անկանխատեսելի վիճակ է և նման վիճակում կանխատեսումներ անելը դժվար է: «Իհարկե, Վերաքննիչ դատարանը թերացավ, երբ Քոչարյանի պաշտպանական թիմին թույլ չտվեց արտահայտվել, միջնորդություններ ներկայացնել, որը կարող է ՄԻԵԴ դիմելու համար ավելորդ հիմք լինել: Ամեն դեպքում, ներկայումս դատական համակարգն անկայուն իրավիճակում է և դժվար է ասել, թե այս պարագայում որ դատարանը ինչ կարող է անել: Մենք տեսանք, թե Դավիթ Գրիգորյանն ինչ աներևակայելի որոշում կայացրեց մի քանի ժամվա մեջ: Այդ առումով դժվար է ասել, թե ինչ կլինի: Պարզապես Վճռաբեկ դատարանում դատավորները շատ ավելի պրոֆեսիոնալ են և օբյեկտիվ որոշում կկայացնեն»,- եզրափակեց Ալեքսանյանը:
Լուսանկարը՝ Armeniasputnik-ի