Ինչպիսի՞ ճակատագիր է ունենալու Ամուլսարի հանքը, ի՞նչ որոշում է սպասվում. «Առաջին լրատվական»-ի հետ զրույցում, անդրադառնալով այս հարցին, շրջակա միջավայրի նախարար Էրիկ Գրիգորյանը նշեց. «Քննչական կոմիտեի կողմից հարուցված քրեական գործի շրջանակներում պատվիրվել էին ուսումնասիրություններ իրականացնել. Քննչական կոմիտեն մայիսին ստացել է Ամուլսարի հանքի շահագործման նպատակով նշանակված համալիր փորձաքննության՝ ջրային ռեսուրսների և երկրաբանության վրա ազդեցության գնահատման նախնական եզրակացությունը: Հունիսի վերջին, ըստ պայմանագրի, ուսումնասիրության վերջնական արդյունքները հայտնի կլինեն»:
Անդրադառնալով դիտարկմանը, որ արդեն սկսվել են խոսակցություններ այն մասին, որ հանքի շահագործման ծրագիրը վերսկսվելու է, նախարարը նշեց. «Տարբեր խսակցություններ կարող են լինել՝ ակտիվացած տարբեր խմբերի կողմից նախաձեռնված, բայց չեմ կարծում, թե այդ խոսակցությունները տարածողները իրականում տեղեկացված են: Քանի որ գործը նախաքննական փուլում է գտնվում, չեմ կարծում, որ կան շրջանակներ, որոնք տեղեկություն ունեն արդյունքներից ու նույնիսկ այդ արդյունքները վերլուծության են ենթարկում և կարծիքներ հայտնում»:
Նախարարը նաև ընդգծեց, որ մտավախություններ կան՝ կապված Ամուլսարի թնջուկի և Սևանա լճի խնդիրների հետ:
Մանրամասն՝ տեսանյութում:
