«Այն, որ մենք չունենք Սահմանադրական դատարան, ոչ թե իրավունքի և մեկնաբանության հարց է, այլ փաստ է: Ազգային ժողովի որոշումները հաստատում են, որ մենք ունենք ՍԴ երկու դատավորներ՝ Արման Դիլանյանն ու Վահե Գրիգորյանը ընտրվել են որպես ՍԴ դատավորներ, իսկ մյուս անդամները նախկինում ընտրվել են որպես ՍԴ անդամներ, և չկա որևէ իրավական ակտ, որը ՍԴ անդամին կարող է փոխակերպել ՍԴ դատավորի կարգավիճակի»,- «Առաջին լրատվական»-ի հետ զրույցում ասաց փաստաբան Կարապետ Բադալյանը՝ անդրադառնալով Վահե Գրիգորյանի ելույթ-մեկնաբանությանը:
Նրա խոսքով՝ սա նշանակում է, որ 9 դատավորով Սահմանադրական դատարան ունենալու մասին սահմանադրական պահանջը կատարված չէ. «Չունենք ՍԴ, որը կարող է գործել մեր Սահմանադրությանը համապատասխան»:
Ինչ վերաբերում է ՍԴ նախագահին, մեր զրուցակիցն ասաց. «Սահմանադրական դատարանի նախագահ կարող է ընտրվել ՍԴ դատավորների կազմից: Մենք ունենք ՍԴ երկու դատավոր, որոնցից մեկը արձակուրդում է, իսկ Վահե Գրիգորյանը միակն է, և նա էլ ներկայացնում է ՍԴ նախագահի իրավազորությունները: Նա հարկադրված էր այդ քայլին գնալ, որովհետև մյուսները չունեն այդ կարգավիճակը»:
Հարցազրույցն ամբողջությամբ՝ տեսանյութում: