ՀՀԿ գործադիր մարմինը հայտարարություն է տարածել Ռոբերտ Քոչարյանի կալանքի վերաբերյալ՝ արձանագրելով, որ «թվով երրորդ կալանավորումը քաղաքական վրեժխնդրության դրսևորում» է: Հանրապետականի գործադիր մարմինը խոսում է նաև քաղաքական հետապնդման, դատական համակարգը իշխանության գործիք դառնալու, իրավունքի ոտնահարման և այլնի մասին՝ արձանագրելով, որ այդ հարցերը ՀՀԿ-ն բարձրացնելու է թե՛ երկրի ներսում, թե՛ միջազգային հարթակներում: Առերևույթ, ՀՀԿ-ն քաղաքական աջակցություն է ցուցաբերում Ռոբերտ Քոչարյանին և դա նոր չէ թե՛ որպես դրսևորում, թե՛ իր բովանդակությամբ:
Սակայն դրանով հանդերձ, դա աջակցություն է միայն ձևով, քանի որ բովանդակային առումով Ռոբերտ Քոչարյանը ՀՀԿ-ից, թերևս, այդ աջակցությունը չէ, որ սպասում է: Բանն այն է, որ Հանրապետականը «բարոյապես աջակցելով» երկրորդ նախագահին, գործնական, քաղաքական դաշտում շարունակում է անտեսել նրա քաղաքական ծրագրային ազդարարումներն ու հայտարարությունները: Մասնավորապես, արդեն «երրորդ անգամ կալանավորվելուց» առաջ Ռոբերտ Քոչարյանը առաջին անգամ քաղաքական դաշտ նետեց իր «ընդդիմադիր բանաձևը»՝ «կոնսենսուս մինուս մեկ»: Ռոբերտ Քոչարյանի վերջին հեռուստահարցազրույցը ամենևին պատահական չէր, և նա, անկասկած, շատ լավ էր հասկանում, որ այդ հարցազրույցը որևէ կերպ չի փոխելու որևէ բան իր գործի վերաբերյալ Վերաքննիչի վճռում:
Քոչարյանն, անշուշտ, շատ լավ գիտեր թե՛ իր խափանման միջոց կալանքը փոխելու Ընդհանուր իրավասության դատարանի վճիռը՝ մինչ այն իրականացնելը, և թե՛ լավ գիտեր, թերևս, վերստին կալանավորվելու վճիռը՝ մինչ այն հնչեցնելը: Դրանից առաջ հեռուստահարցազրույցի նպատակը ոչ թե որևէ բան փոխելն էր այդ հարցում, այլ կալանքից առաջ «վերջին խոսքը» կամ կարևոր «վերջին ուղերձները» հղելը: Եվ այդ առումով երկրորդ նախագահ Քոչարյանը առանցքային ասելիքը հղեց՝ Հայաստանի ներքին տիրույթին «կենսենսուս մինուս մեկ» բանաձևը առաջարկելով, և իհարկե դիմելով արցախյան հանրությանը այնտեղ սպասվող նախագահի ընտրության թեմայով: Այդ առումով, Ռոբերտ Քոչարյանն իր հարցազրույցից հետո բարոյական աջակցություն կամ քաղաքական դատապարտում չէ, որ ակնկալում էր որևէ ուժից, այլ արձագանք «կոնսենսուս մինուս մեկ» բանաձևին: Ահա այստեղ է, որ ՀՀԿ-ն առերևույթ բարոյական աջակցություն ցուցաբերելով և դատապարտելով Ռոբերտ Քոչարյանի քաղաքական կալանավորումը, ԳՄ մակարդակով բացարձակ անտարբերության մատնեց Ռոբերտ Քոչարյանի գլխավոր ազդակը կամ ուղերձը, փաստացի ակնարկելով, որ առնվազն այս պահին երկրորդ նախագահը ՀՀԿ-ից կարող է ակնկալել միայն բարոյական աջակցություն: