Ադրբեջանի արտգործնախարար Էլմար Մամեդյարովը հայտարարել է, որ վաշինգտոնյան հանդիպման դրական գործոնն այն է, որ ԵԱՀԿ Մինսկի խմբի համանախագահները պաշտոնական ձևաչափով դարձյալ ներկայացրին այն փաստաթղթերը, որոնք նախկինում քննարկվել էին։ Հանդիպման ընթացքում բարձրացվել է շփման գծում կայունությունն ապահովելու հարցը, ինչին ի պատասխան Մամեդյարովը նշել է, թե լուրջ բանակցություններ են վարվել նաև այն ժամանակ, երբ շփման գծում հանգիստ չէր։
Մամեդյարովի այս հայտարարությունը նշանակո՞ւմ է արդյոք, որ 2018-ի մայիսից ի վեր պահպանվող անդորրի շուրջ ձեռք բերված այդ պայմանավորվածությունն այլևս ակտուալ չէ, և Ադրբեջանը հետ է վերադառնում իր նախկին մարտավարությանը «Առաջին լրատվական»-ի հարցին քաղաքագետ Ստեփան Սաֆարյանը պատասխանեց․ «Ադրբեջանը կփորձի վերադառնալ, որովհետև գիտակցում է այն անհավասարությունը և այն խոշոր պրոբլեմները, որոնք ի հայտ են եկել Հայաստանում թավշյա հեղափոխությունից հետո։ Խոսքն առաջին հերթին վերաբերվում է նախկին իշխանությունների հետ բացարձակապես թելերով չկապված Նիկոլ Փաշինյանի իշխանության գալուն։ Երկրորդը վերաբերում է Նիկոլ Փաշինյանի լեգիտիմությանը, որը նրանց շատ է վախեցնում, որովհետև նրանց հաշվարկների մեջ տեղ էր գտել նաև Հայաստանի իշխանությունների թույլ լեգիտիմությունը։ Երրորդ, կարևորագույն, մահու չափ վախեցնող գործոնը Նիկոլ Փաշինյանի նոր կոնցեպտն է՝ որքան էլ Հայաստանը հանդիսանում է Արցախի անվտանգության երաշխավորը, այնուամենայնիվ, Արցախի ճակատագրի հարցը պետք է լուծի բանակցություններին մասնակցող Արցախի Հանրապետության ներկայացուցիչը։ Ինչո՞ւ է այս երեք կոմպոնենտը կարևոր, որովհետև նրանց հաշվարկը հետևյալն էր՝ Հայաստանի իշխանությունները չունեին լեգիտիմություն, իշխանությունը պահելու համար Հայաստանի իշխանությունները դիմել էին արտաքին լեգիտիմության գործոնների, հետևաբար, Հայաստանի իշխանությունների նկատմամբ պետք է կիրառվեր ճնշումներ մի քանի ուղղություններից»։
Իսկ միջազգայնագետ Արմենակ Մինասյանցն ասաց․ «Ես չեմ կարծում, որ երբևիցե Ադրբեջանը հետ էր նահանջել իր կոշտ դիրքորոշումից։ Պարզապես բանակցային գործընթացում կար առաջնային խնդիր, դա Հայաստանի ներքաղաքական զարգացումներն էին։ Այսինքն՝ թավշյա հեղափոխությունից հետ ստեղծվել էր մի իրավիճակը, որն անկանխատեսելի էր նաև նրանց համար, և որոշ ժամանակ էր նրանց պետք, որպեսզի հասկանան, քանի որ նոր անձեր էին, նոր ֆիգուրներ էին, որոնց հետ նրանք պետք է աշխատեին»։
Մանրամասները՝ տեսանյութում։
