ՀՀ երկրորդ նախագահ Ռոբերտ Քոչարյանի և մյուսների բողոքները քննող Վերաքննիչ քրեական դատարանի դատավոր Արմեն Դանիելյանը որոշում է կայացրել դատախազ Պետրոսյանի, տուժողների և նրանց իրավահաջորդների ներկայացուցիչների վերաքննիչ բողոքները բավարարել։
Միջդատական վարույթի ընթացքում, որպես խափանման միջոց ընտրված կալանավորման վերացման, փոփոխման կամ պահպանման հարցի քննության առնելու մասին առաջին ատյանի դատարանի դատավոր Դավիթ Գրիգորյանի մայիսի 18-ի որոշումը բեկանել։
Դատարանը վերացրել է նաև Արցախի ներկա և նախկին նախագահների՝ Արկադի Ղուկասյանի և Բակո Սահակյանի անձնական երաշխավորությունները և հանձնարարել վերադարձնել գումարը:
Ի՞նչ է նշանակում այս ամենը: Թեմայի շուրջ «Առաջին լրատվական»- ի հետ քննարկմանը մասնակցեցին ազատամարտիկ Վարդան Մալխասյանը, քաղաքագետներ Ռուբեն Մեհրաբյանը և Արկադի Վարդանյանը:
Մեկ տարվա մեջ երեք անգամ կայացվում է նախկին նախագահի կալանավորման մասին որոշում: Անդրադառնալով այս դիտարկմանը՝ Ռուբեն Մեհրաբյանը նշեց. «Սա նշանակում է, որ մեր դատական համակարգը հիվանդ է, և սա այդ հիվանդության ամենավառ դրսևորումն է… Այսօր տեղի ունեցավ չափազանց կարևոր մի բան, բայց սա դեռ նույնիսկ ճանապարհի կեսը չէ, առջևում դեռ գործի քննությունն է: Փորձելու են արհեստականորեն ձգձգել, որպեսզի դատավորին շեղեն քննությունից, բայց ավարտը մոտենում է, կթևակոխենք մի փուլ, երբ թե՛ Քոչարյանը, թե՛ իր պաշտպանները լուռ նստելու են և լսեն, որովհետև ասելիք չեն ունենա մի քանի տասնյակ հատոր մի քանի հարյուր մարդկանց ցուցմուքների դեմ»:
«Շինծու գործ էին հարուցել մեր նկատմամբ, Եվրադատարանն արդարացրեց մեզ, իրավապաշտպան կազմակերպությունները մեզ ճանաչեցին քաղբանտարկյալ: Սա վկայում է այն մասին, որ այն ժամանակ կամայական է եղել ամեն ինչ, անմեղ մարդկանց բանտարկեցին, խեղեցին, ինչքան մարդիկ փախան երկրից… Մարդկանց արյան ու դիակների վրայով Ռ. Քոչարյանը Սերժ Սարգսյանին բերեց իշխանության, որ հանկարծ ուրիշը չգա իշխանության և չբացահայտի իր բոլոր ոճրագործությունները: Քոչարյանը ոտքից գլուխ թաղված է հանցանքների մեջ և պաշտպանվելու հիմքեր չունի»,- նշեց Վարդան Մալխասյանը:
Մեր զրուցակիցների դիտարկմամբ՝ Քոչարյանն ատում էր ժողովրդին և վաստակեց ժողովրդի ատելությունը և «որքան էլ Մոսկվան կանգնի նրա մեջքին, նա պետք է դատվի»:
Մանրամասն՝ տեսանյութում: